आकिवंनिसें भारतयात विद्युत मीगु

येँ – नेपालं आः तक भारतपाखें मत न्यानाः कयाच्वंगु खःसा आकिवंनिसें मत मी नं फइगु अवस्थाय् थ्यंगु दु । मत उत्पादनय् नेपालं यानाच्वंगु तीव्र विकासया झ्वलय् आकिवं भारतयात ५०० मेगावाट तक मत मी फइगु अवस्था ब्वलंगु खँ उर्जा मन्त्रालयं धाःगु दु ।

भारतय् मत मीगु लागिं गुगु पूर्वाधार आवश्यक जूगु खः, थ्व समेत नेपालं दयेके धुंकूगु जुयाः आकिवंनिसें मत मी फइगु खँ नं उर्जामन्त्री वर्षमान पुनं कनादीगु दु । भारतय् मत छ्वयेगु लागिं दयेकूगु थीथी कथंया पूर्वाधारया परीक्षण यासें नेपालं थुगुसी २०० मेगावाट मत निर्यात समेत यायेधुंकूगु दु ।

आकिवं थुकिया मात्रा बढे जुयाः ५०० निसें ७०० मेगावाट थ्यनीगु खँ धाःगु दु । आकिवं तकया दुने अपर तामाकोशीं ४८० मेगावाट मत उत्पादन शुरु जुइवं नेपाः थःत अप्वः जूगु बिजुली भारतयात मी फइगु अवस्थाय् थ्यनीगु खः । आकिवं नेपाःया कुल मत उत्पादन २ हजार मेगावाट थ्यनीगु अनुमान याना तःगु दु ।

यदि नेपालं दँय्दसं थ्वहे परिमाणय् भारतय् मत मी फत धाःसा भारतयात मतया लागिं दँय् १८ अर्ब तका पुले मालीगु ध्यबा बचे जुइगु खँ नं धाःगु दु । नेपालं थःत अप्वः जूगु मत बंगलादेशय् नं मीगु लागिं सम्झौता यायेधुंकूगु दु । तर बंगलादेशय् वनीगु मत भारतया तार जुयाः वने माःगु जूगुलिं उकी भारतया नियन्त्रण दये फुगु खँ धया हःगु दु ।