ने. सं. ११४३ चौलाथ्व पारू -

टर्कीइ ७.८ रेक्टरया शक्तिशाली भुखाय् ब्वल

एजेन्सी- टर्कीइ सोमवाः सुथय् तःधंगु भुखाय् ब्वःगु दु । दक्षिण पूर्वी टर्कीया गाजियान्टापयात केन्द्रविन्दु दयेकाः सोमवाः सुथय् स्थानीय ई कथं ४ः१७ ताः इलय् ७.८ म्याग्निच्युडया भुखाय् ब्वःगु खः । भुखाय्या धक्का टर्कीया राजधानी अकंरालिसें झिगू शहर काहमानमार्श, हाते, गाजियान्टाप, ओस्मानी, आदियमान, सानपलउर्फा, मालत्या, अडाना, दियारबाकिर व किलिसय् लाःगु खः । अथेहे सिरिया, लेबनान, साइप्रस, प्यालेस्टाइन व इजरायलय् तकं भुखाय्या धक्का लाःगु खः । भुखाय् लिपा इटालीं सुनामी वइगु खतरा दुगु धकाः सचेत याःगु खः ।

भुखाचय् लानाः टर्की व सिरियाय् यानाः द्वलंद्वः मनूत सीगु दु । राष्ट्रपति रेसेप इर्डोगनं सोमवाः सनिलय् तकया दुने टर्किइ जक गुसः व झिंनिम्ह मनूत सीधुंकूगु व ५३८३ म्ह मनूत घाःपाः जूगु खँ धाःगु ।

भु्खाय् लानाः सिरियाय् नं प्यसलं मल्याक मनूत सीगु दु । भुखाचं यानाः यक्व हे छेँ दुनाच्वंगु व उकी यक्व हे मनूत ल्हानाच्वंगुलिं सीपिनि ल्याः अप्वया वनाच्वंगु दनि । टर्किया राष्ट्रपतिया कथं भुखाचय् लानाः टर्किइ जक २ हजार ८१८ खा छेँ दुंगु दु । वय्कःया कथं टर्किइ जूगु थ्व विनाशकारी भुखाय् सन् १९३९लिपा न्हापांगु खः ।

सामाजिक सञ्जालय् खनेदुगु किपाय् यक्व हे छेँ दुनाच्वंगु खनेदुसा अस्पताल घाःपाः जूपिंसं जायाच्वंगु दु । तःभुखाय् ब्वःगु ११ मिनेट लिपा हाकनं ६.७ या लिभुखाय् ब्वःगु खःसा वयां १९ मिनेट लिपा हाकनं ५.६ म्याग्निच्युडया भुखाय् ब्वःगु खः । थ्व धुंकाः नं यक्व हे लिभुखाय् ब्वयाच्वंगु दनि । टर्कीया प्रकोप तथा आपतकालीन व्यवस्थापनया अधिकारीतय्सं बिउगु जानकारीकथं थ्यंमथ्यं ४० क्वलं मल्याक लिभुखाय् ब्वयेधुंकूगु दु ।

भुखाय् लिपा टर्की व सिरियां संकटकालया घोषणा याःगु दुसा अन्तर्राष्ट्रिय ग्वाहालिया निंतिं नं अपिल याःगु दु । अमेरिकी राष्ट्रपति जो बाइडेनं ग्वाहालि थ्यंकेगु निंतिं अमेरिकाया अन्तर्राष्ट्रिय ग्वाहालि निकाययात निर्देशन बिउगु दु । इजरालय व युक्रेनं नं माःगु ग्वाहालि यायेत थःपिं तयार दु धाःगु दु ।

अथेहे बेलायती प्रधानमन्त्री ऋषि सुनक, फ्रान्सया राष्ट्रपति इमानुएल म्याक्रों नं टर्कि राहत छ्वयेगु घोषणा यासें विश्वयात नं ग्वाहालिया निंतिं इनाप याःगु दु । अथेहे टर्किया रेडक्रसं उपचारया निंतिं हि आवश्यक जुइगुलिं हिदान यायेत आह्वान याःगु दु ।

टर्कि सरकारं भुखाचं प्रभावित झिगू शहरय् छवाःया निंतिं स्कूल बन्द यायेधुंकूगु दु ।