युनाइटेड नेवाःपाखें ग्वाहालि

येँ – अमेरिकाया टेक्सास राज्यया ड्यालस शहरय् च्वनाच्वंपिं नेवाःतय्सं नीस्वनातःगु ‘युनाइटेड नेवाः युएसए’ पाखें कोभिड विरामीया निःशुल्क सेवा यायेगु लागिं थनया छत्रपाटी निःशुल्क चिकित्सालययात आर्थिक ग्वाहालि लःल्हाःगु दु । युनाइटेड नेवाः युएसएपाखें म्हिगः छगू बःचाधंगु ज्याझ्वःया दथुइ चिकित्सालयया नायः डा. मनोजमान श्रेष्ठयात १५ लाख ६३ हजार ८७५ तका ९० पैसाया चेक लःल्हाःगु खः ।

थ्व झ्वलय् युनाइटेड नेवाः युएसएया नायः महेन्द्र मानन्धरं कोभिडया विरामीतय्त निःशुल्क सेवा बियाः सञ्चालन जुयाच्वंगु नेपाःया संस्थायात ग्वाहालि याये दयाः थःपिं लय्ताःगु खँ कनादिल ।

अथे हे उपाध्यक्ष शैलेन्द्र मानन्धरं अमेरिकाय् च्वंपिं नेपाःमितय्सं थःगु देश लुमंकाः गच्छे कथं बिउगु ध्यबा मुंकाः नेपाः छ्वया हयागु सन्देश बिसें भविष्यय् नं माल धाःसा थुकथंया ग्वाहालि यायेगु बचं बियादिल । लिसें वय्कलं थुगु चन्दा मुनेज्याय् ग्वाहालि यानादीपिं संस्था दुजःपिं सचिन्द्र शाक्य, रवि महर्जन, प्रज्वल महर्जन व नरेश महर्जनयात नं सुभाय् देछानादिल ।

सम्बन्धित बुखँ

LEAVE YOUR COMMENTS