ने. सं. ११४६ अनलाथ्व नवमी -

निजी विद्यालयय्् लाक्वपाक्व शुल्क

‘तःधंगु व बांलाःगु’ धयातःगु निजी विद्यालयय् कायम्ह्याय् भर्ना यायेत सहरी क्षेत्रया अभिभावकं दँय्दसं सकसया अनुभव यायेमाः । भर्नाया निंतिं प्रवेश परीक्षा बीमाःगु, शैक्षिक सत्र शुरु जुइ न्ह्यः हे थिकेक शुल्क पुलाः भर्ना यायेमाःगु व गुलिखे स्कुलय् धाक्व ध्यबा मबिल धाःसा भर्ना याये मखनीगु समस्या इमिसं फया वयाच्वंगु दु ।

थः यसें शुल्क वृद्धिलिसें अप्वःथें निजी (संस्थागतं) विद्यालयय् भर्ना जुइधुंकाः अभिभावक व विद्यार्थी असन्तुष्ट जूसां नं इपिं सामुदायिक विद्यालयय् भर्ना मयासे निजी विद्यालयय् हे थः मस्तय्त ब्वंकेत बाध्य जुयाच्वंगु दु । भर्ना सिधयेधुंकाः अभिभावक व विद्यार्थी संघसंगठनं शुल्कया वृद्धिया विरोध यायेगु याइ ।

विरोधयात संबोधनया औपचारिकता पूवंकेत सम्बन्धित सरकार व निकायं वृद्धि जूगु शुल्क लित कायेत निर्देशन नं बी । तर निजी विद्यालयं धाःसा उकियात ताःसां मताः पहः यानाच्वनी । थ्व दथुइ आखः ब्वंकेगु नं शुरु जुइ । अनं लिपा वार्षिक परीक्षा वइ । अले हाकनं मेगु दँया न्हूगु शैक्षिक सत्रलिसें शुल्कया नामय् विरोध व सहमतिया पुलांगु हे श्रृंखला दोहरे जुइ ।

निजी विद्यालयया ल्याः अप्वः दुगु येँ महानगरपालिकाया शिक्षा समितिं थुगु दँया शैक्षिक सत्रया निंतिं वृद्धि जूगु शुल्क लित काये बैशाख ११ गते निर्देशन बीगु निर्णय याःगु खः । अप्वःथें विद्यालयं भर्ना पुरा यायेधुंकूगुलिं उगु शुल्क लित बीगु सम्भावना खने दयाच्वंगु मदु । विगतय् नं भर्ना सिधयेकाः विद्यार्थी संगठनं आन्दोलन यायेवं शिक्षा मन्त्रालयलिसेया सहमतिइ थःयसे वृद्धि याःगु शुल्क मेगु महिनाया शुल्कय् समायोजन यायेगु धाःसां नं उकिया कार्यान्वयन जूगु मदु ।

येँ मनपाया शिक्षा विभागं क, ख, ग व घ वर्गया आधारय् शुल्क क्वःछीगु निंतिं केन्द्र सरकारया विगतया मापदण्डया आधार नालाकाःगु खःसां नं शुल्कया अनुगमन जुयाः लित बीगु प्रक्रिया धाःसा शुरु जूगु मदु । येँ मनपा शिक्षा विभागया प्रमुख निर्मला केसीं सम्बन्धित पक्षया परामर्शय् हे निर्देशन जूगुलिं वृद्धि जूगु शुल्क लित काये मफइगु जिकिर यानादिल ।

निजी विद्यालयं वार्षिक शुल्क, ट्युशन शुल्क, खाजा, बस, परीक्षा शुल्क लिसें मेमेगु शीर्षकय् मनोमानी धंगं शुल्क कायेगु याना वयाच्वंगु दु ।
येँ मनपां शैक्षिक सत्र २०७६ या निंतिं छगू निसें न्यागू तगिं तक ‘घ’ वर्गय् लाःगु विद्यालयं अप्वलय् मासिक शुल् १,६३०, ‘ग’ वर्गया निद्वः, ‘ख’ वर्गया २,४१८ व ‘क’ वर्गया निंतिं २,८१२ क्वःछिउगु खः ।

खुगूनिसें च्यागू तगितक ‘घ’ वर्गया अप्वलय् शुल्क १,९०१, ‘ग’ वर्गया २,३५१, ‘ख’ वर्गया२,८०१ व ‘क’ वर्गया ३,२५१ कायम याःगु दु । गुंगू व झिगू तगिमय् ‘घ’ वर्गया विद्यालयं ३,५३७ तक अप्वः शुल्क काये दइगु निर्णय याःगु खः । ‘ग’ वर्गया निंतिं ३,०४९, ‘ख’ वर्गया निंतिं ३,७६२ व ‘क’ वर्गया निंतिं ४,२७६ तका तक अप्वः शुल्क क्वःछिनातःगु दु, तर ततःधंगु विद्यालयं उकिया निदुगंनिसें स्वदुगं तक शुल्क कया वयाच्वंगु दु ।

महानगर दुने थौंकन्हय् ९१ गू सामुदायिक व ६४५ गू संस्थागत विद्यालय दु । थुपिं विद्यालयय् निगू लाख स्वद्वः व ९७१ विद्यार्थीत अध्ययन यानाच्वंगु दुसा उकीमध्ये छगू लाख न्यय्च्याद्वः विद्यार्थी संस्थागत व ल्यं दुपिं सामुदायिक विद्यालयय् अध्ययन यानाच्वंगु दु ।

उखे निजी तथा आवासीय विद्यालय अर्गनाइजेसन (प्याब्सन) व राष्ट्रिय निजी तथा आवासीय विद्यालय संगठन (एन प्याब्सनं) निजी विद्यालययात नं सम्पत्तिया अधिकार दुगु व थःपिंसं लागत व खर्चया लिधंसाय् जक शुल्क कया वयाच्वनागु धाःगु दु । नेपाल अभिभावक संघं मापदण्ड स्वयां अप्वः काःगु शुल्क लित बीमाःगु माग यासें जेठ महिनाया शुल्कय् समायोजनया निंतिं थःपिं हे जागरुक जुयाः न्ह्यचिलेमाःगु धाःगु दु ।