ससफो गोकर्णेश्वर नगर कमिटी गठन
येँ – संघीय समाजवादी फोरम नेपाल गोकर्णेश्वर नगरपाकिलाया न्हापांगु नगरस्तरीय भेला जुल । भेलां पार्टीया नगर समिति नं गठन याःगु खः । भेलाया उलेज्या पार्टीया सहअध्यक्ष राजेन्द्रप्रसाद श्रेष्ठं यानादीगु खः ।भेलाय् नवासें प्रतिनिधिसभा सदस्यतकं जुयाच्वनादीम्ह पार्टी सहअध्यक्ष श्रेष्ठं पहिचान व समृद्धिया चाहना यानाच्वंपिं जनताया निंतिं नेपाल कम्युनिष्ट पार्टी व नेपाली कांग्रेस थेंज्याःगु पुलांगु परम्परागत परम्परावादी दलत हिन्दूतय्सं दुरु बीमफुम्ह सायात नं गौमाता धकाः दाना नकातःगु थें जूगु द्वपं बियादिल ।
भेलायात संबोधन यायेगु झ्वलय् सहअध्यक्ष श्रेष्ठं धयादिल, ‘पुलांगु ब्रान्ड जूगु धासें देय्या विकास व समृद्धिया निंतिं धकाः जनतां पुलांगु हे राजनीतिक दलतय्त तःक्वः तःक्वः सत्ताय् थ्यंकेगु ज्या यात तर, इमिसं जनतायात छुं नं मबिउ । अज्याःगु दलतयसं गकुथं याइ नेपाःया विकास ?’पुलांगु दलतय्पाखें जनतां थौंतक नं अभाव, गरिबी व बेरोजगारी बाहेक मेगु छु हे प्राप्त याये फत धइगु न्ह्यसः तसें वय्कलं धयादिल, ‘जनतां न त शान्ति, न सुशासन, न समृद्धि हे प्राप्त याये फत, उकिं गथे दुरु बी मफुम्ह सा प्वाथय् दइमखु, अथे हे आः नेकपा व कांग्रेसपाखें देय् नं न्ह्याये फइमखु ।’
पुलांगु दलया जग लिगिलिगि सनेधुंकूगु दु धासें आः वइगु निर्वाचनय् इमिगु पौ नं दुना वनीगु व कांग्रेस–कम्युनिष्टं न्ह्यःने हःगु समाजवाद व जनवादया विकल्पय् आः संघीय समाजवाद ज्वनाः थनिंनिसें हे जनताया छेँखा–छेँखाय् वनेमाः धयादिल । लिसें वय्कलं नगरपालिकाया प्रत्येक वडाय् पार्टीया संगठन विस्तार याना यंकेत नं इनाप यानादिल ।
नगरपालिकाया युवा नेता श्रीकृष्ण नगरकोटीया सभापतित्वय् पार्टीया राजनीतिक समितिया दुजः नवराज दाहालं नं नुगःखँ तयादीगु भेलाय् प्रदेश नं. ३ या सह इन्चार्ज केबी घःजु, अध्यक्ष लालबहादुर तामांग, उपाध्यक्ष न्हुछेलाल महर्जन मुख्य सचिव तारासिं विश्वकर्मा, केन्द्रीय दुजःपिं विष्णु पौडेल, केशव दाहाल, मानबहादुर धामी, मोहन बराईली लगायता थीथी तहया नेतातय् उपस्थिति दुगु खः।
भेलां नगरकोटीया अध्यक्षताय् झिंछम्हेसिया नगर समिति नं गठन याःगु खः ।कमिटीइ राजेन्द्र भुसाल व विष्णु लोप्चन उपाध्यक्ष, देवीप्रसाद पौडेल सचिव, दिया पौडेल उपसचिव व देवकला बराइली कोषाध्यक्षय् च्वनादीगु दुसा नैनकला प्रधान, यदुनाथ बस्ताकोटी, कमला पुरी, सूर्य लामा व एकबहादुर लामिछाने दुजलय् च्वनादीगु दु ।
LEAVE YOUR COMMENTS