सम्पदा संरक्षण यायेत गुरुयोजना
थिमि÷मध्यपुर थिमि नगरपलिकाया ऐतिहासिक, धार्मिक, सांस्कृतिक महत्वया सम्पदा संरक्षण व विकास यासें नमूना सांस्कृतिक नगरी निर्माण यायेत नगरपालिकां सांस्कृतिक गुरुयोजना निर्माणया ज्या न्ह्याकूगु दु । नगरपालिकां ग्वसाः ग्वःगु छगू समारोहय् प्रदेश नं. ३ या प्रमुख अनुराधा कोइरालां मध्यपुर थिमि नगरयात ‘सांस्कृतिक नगरी मध्यपुर थिमि’ घोषणा यायेवं नगरपालिकां उकिया संरक्षण व विकासया निंतिं गुरुयोजना निर्माणया ज्या न्ह्याकूगु खः ।
नगरपालिकां पुरातात्विक, धार्मिक, ऐतिहासिक, सांस्कृतिक सम्पदाया खोज, अनुसन्धान व संरक्षणया निंतिं न्ह्याकूगु गुरुयोजना निर्माणया ज्या लिपांगु चरणय् थ्यने धुंकूगु नगरप्रमुख मदनसुन्दर श्रेष्ठं जानकारी बियादिल ।
नगरपालिका दुने भौतिक संरचनाया रुपय् दुगु धार्मिक सम्पदा, देगः, सतः फल्चा, ल्वहंहिति, ऐतिहासिक तुं, सम्पदा, ऐतिहासिक वस्ती, ख्यःया खोज, अनुसन्धान, उत्खनन्, संरक्षण, पुनःनिर्माण, जिर्णोद्वार व विकास यानाः उकिया संरक्षण यायेगु ल्याखं नगरपालिकां गुरुयोजना निर्माण यानागु वय्कलं कनादिल ।
थुकथं हे अमूर्त सम्पदाया रुपय् दुगु थनया परम्परागत भाषा, हस्तलिपि, भेषभूषा, म्येँ, संगीत, बाजं, हुलाप्याखं व झाँकी, रीतिरिवाज व परम्परा, तिसाज्वलं, जात्रा परम्परा, ऐतिहासिक दस्तावेज, ग्रन्थ, परम्परागत नसाज्वलंया तकं खोज व अनुसन्धान यायेगु, लोप जुया वनेधुंकूगुयात पुनर्जीवन बीगु व लोपोन्मुख अवस्थाय् थ्यंगुयात संरक्षण याइगु जूगु दु ।
नगरपालिका दुने दुगु विशेष व्यक्तित्व व गुरुया तकं योगदानयात कदर यायेगु व इमिगु जीवनी तयार यायेगु, इमिसगु कला व शिक्षायात संरक्षण यायेगु योजनातकं नगरपालिकां दयेकूगु दु ।
‘मध्यपुर थिमि नगरपालिका दुने दुगु मूर्त व अमूर्त कला, संस्कृति, सम्पदानिसें दक्वं विषयय् खोज, अनुसन्धान, संरक्षण व विकास यायेगु ल्याखं गुरुयोजना निर्माण यायेगु ज्या जुयाच्वंगु दु’, नगरप्रमुख श्रेष्ठं धयादिल, ‘गुरुयोजना निर्माण यायेगु ज्या क्वचायेवं उकियात कार्यान्वयनय् यंकेगु, मध्यपुर थिमि दुने जीवित संग्रहालयतकं निर्माण शुरु जूगु व मध्यपुर थिमियात नमूना सांस्कृतिक नगरी दयेकेगु जुइ ।’
नगरपालिका दुनेया परम्परागत वस्तीयात जीवित संग्रहालयतकं दयेकेगुकथं नगरपालिकां गुरुयोजना निर्माण यायेगु ज्या न्ह्याकूगु व थुकिं आन्तरिक व बाह्य पर्यटकयात तकं अप्वयेकीगु वय्कःया धापू दु । नगरपालिकां सांस्कृतिक नगरीया गुरुयोजना निर्माणया निंतिं दयेकूगु तर्जुमा समितिया दुजः नवीनप्रकाश श्रेष्ठं गुरुयोजना निर्माणया ज्या लिपांगु चरणय् थ्यनेधुंकूगु कनादिल ।
वय्कलं धयादिल, ‘ज्या जुयाच्वंगु दु, गुरुयोजना निर्माणया ज्या लिपा नगरपालिकां स्वदँ, न्यादँ व झिदँया दुने सम्पन्न यायेमाःगु छु छु योजना दइ धइगु तकं निक्र्योल यायेगुकथं सुक्ष्मरुपय् अध्ययन यानाः गुरुयोजना निर्माण यानाच्वनागु दु ।’ गुरुयोजनायात पूर्णरुपय् कार्यान्वयनय् हये धुंकाः वइगु झिदँया दुने मध्यपुर थिमि नगरपालिका देय्या हे छगू नमूना नगरपालिकाया रुपय् स्थापित जुइगु विश्वास कयागु वय्कलं धयादिल ।
LEAVE YOUR COMMENTS