सरकारया स्मार्ट मालपोतय् समस्या

येँ – सरकारं येँया मालपोत ज्याकूपाखें याकनं सेवा बीगु धकाः ‘स्मार्ट मालपोत’ घोषणा याःगु खःसां नं घोषणाकथं ज्या धाःसा जुयाच्वंगु मदु । वंगु असारय् प्रधानमन्त्री केपी शर्मा ओलीं स्मार्ट मालपोतया घोषणा यासें याकनं सेवा बीगु व भ्रष्टाचारयात म्हो यायेगु धकाः धाःगु खः ।

तर सेवाग्राहीं धाःसा जग्गा छकू पास याकेगु निंतिं नं निन्हु तक ई बीमाःगुलिं स्मार्ट स्वयां न्हापा बियाच्वंगु सेवां हे याकनं ज्या जुइगु खँ धाःगु दु । थौंकन्हय् जग्गा पास याकेगु निंतिं जग्गा मीम्ह व न्याइम्ह निम्हेसिया पूर्ण विवरण दुथ्याकेमाः । तर विवरण दुथ्याकेगु निंतिं मालपोतया कम्प्युटर सफ्टवेयरं ज्या मयाइगु, किपा कायेत तकं घन्टौं पीमालीगु आपालं समस्या दुगु खँ नं सेवाग्राहीं धाःगु दु ।

सरकारं स्मार्ट मालपोत घोषणा याःसां नं सेवाग्राहीं न्हापा स्वयां अप्वः दुःख सीमाःगु खँ कलंकी मालपोत व डिल्लीबजार मालपोतय् थःगु ज्या याकेत वःपिंसं धायेगु यानाच्वंगु दु । प्रधानमन्त्री थम्हं हे घोषणा याःगु ज्याझ्वः तकं इलय् मजूगु धासें सेवाग्राही असन्तोष जुयाच्वंगु दु ।

सम्बन्धित बुखँ

LEAVE YOUR COMMENTS