भाषा आयोगया प्रतिवेदन कार्यान्वयन यायेत प्रधानमन्त्रीयात ज्ञापनपौ

येँ- देय्या थीथी प्रदेशय् छु छु भाषायात सरकारी ज्याखँया भाषाया रुपय् प्रयोग धकाः अध्ययन यासें भाषा आयोगं तयार यानाः सरकारयात बिउगु सिफारिस कार्यान्वयन यायेगु लागिं थीथी जाति–भाषाया संस्थातय्सं नेपाल सरकारयात इनाप याःगु दु ।

भाषा आयोगया सिफारिसय् लाःगु ११ गू भाषालिसे सम्बन्धित थीथी खलःपुचःया प्रतिनिधितय्सं म्हिगः प्रधानमन्त्री शेरबहादुर देउवायात नापलानाः छगू मंकाः ध्यानाकर्षण पौ लःल्हासें आयोगया सिफारिस कार्यान्वयन यायेत माःगु कानून दयेकेत पहल याना बीगु लागिं इनाप याःगु खः ।

संविधानया धारा ७ या उपधारा (२) कथं सरकारं आवश्यक कानून दयेकाः जक भाषा आयोगया सिफारिस कार्यान्वयन याना यंके फइगु व्यवस्था दु । उकिं संविधानय् याना तःगु उगु व्यवस्था कथं प्रदेश सरकारतय्त आवश्यक कानून दयेकाः आयोगया प्रतिवेदन कार्यान्वयन याके बीत समन्वय व सहजीकरण याना बी माल धकाः ध्यानाकर्षण पतिइ संघीय सरकारयात इनाप यानातःगु दु ।

ध्यानाकर्षण पतिइ नेवाः देय् दबूपाखें नायः नरेश ताम्रकार, किरात याक्थुङ चुम्लुङया नायः योगराज लिम्बु वनेम, नेपाल तामाङ घेदुङया नायः मोहन गोले तामाङ, तमू ह्युल छोंज धी गुरुङया नायः रेशम गुरुङ, मगर संघया महासचिव ज्ञानेन्द्र पुन मगर, थारू कल्याणकारिणी सभाया महामन्त्री प्रेमीलाल चौधरी, अवधि सांस्कृतिक विकास परिषद्या नायः विक्रममणि त्रिपाठी, मैथिल महासंघ नेपालया संस्थापक नायः अमरेशनारायण झा, डोट्याली भाषिक संस्थापाखें भुवनबहादुर बोहरापिंसं हस्ताक्षर यानादीगु दुसा भोजपुरी व बज्जिका भाषिक संस्थाया नां जक दुथ्याकातःगु दु ।

प्रधानमन्त्री कार्यालयय् ध्याना– कर्षण पौ लःल्हायेगु लागिं ‘सरकारी कामकाजी भाषा कार्यान्वयन कार्यदल’ या मेमेपिं दुजःपिं नं झाःगु खः । थ्व कार्यदलय् भाषा आयोगं सिफारिस याःगु ११ गू भाषालिसे सम्बन्धित खलःपुचःत दुथ्यानाच्वंगु दु ।

प्रतिवेदनप्रति प्रम देउवा सकारात्मक
थीथी भाषाभाषी संस्थाया प्रतिनिधितय्सं लःल्हाःगु ध्यानाकर्षण पौ लःल्हाना कासें प्रधानमन्त्री शेरबहादुर देउवां उकियात कार्यान्वयन यायेगु लागिं आवश्यक पहल यायेगु बचं बियादीगु खँ नेवाः देय् दबूया नायः नरेश ताम्रकारं कनादिल । आयोगया प्रतिवेदन प्रति थः सकारात्मक दुगु खँ नं प्रम देउवां कनादीगु खः । देसय् समावेशी वातावरण निर्माण जुइधुंकूगु कारणं फुक्कं भाषायात समान अधिकार बीत थःपिंसं थ्व प्रतिवेदन कार्यान्वयन याके बी धकाः नं प्रम देउवां बचं बियादीगु खः ।

संघीय सरकारय् प्रधानमन्त्रीयात ध्यानाकर्षण पौ बीधुंकाः आः थीथी प्रदेशय् नं सम्बन्धित भाषिक समुदायया प्रतिनिधिपिं वनाः प्रदेश सरकारया ध्यानाकर्षण याना वनेगु खँ नायः ताम्रकारं ‘नेपालभाषा टाइम्स’यात कनादिल ।

सम्बन्धित बुखँ

LEAVE YOUR COMMENTS