आयुर्वेद अस्पतालय् आइसोलेसन संचालन

येँ- येँ महानगरपालिकाया आर्थिक ग्वाहालिं न्यतय् च्वंगु आयुर्वेदक अस्पतालय् आइसोलेसन संचालन जूगु दु । येँ मनपाया आर्थिक ग्वाहालिइ अस्पतालय् हाई डिपेन्डेसी युनिट (एचडीयु)सहितया ५० बेडया आइसोलेसन संचालनय् हःगु खः ।

येँ महानगरपालिका व अस्पताल दथुइ वंगु बैशाख २७ गते जूगु सम्झौताकथं अस्पतालय् आइसोलेसन संचालनय् वःगु खः । शरही विकास राज्यमन्त्री रामवीर मानन्धर, येँ महानगर प्रमुख विद्यासुन्दर शाक्य व उपप्रमुख हरिप्रभा खड्गी श्रेष्ठं आइसोलेसनया मंकाःकथं उलेज्या यानादीगु खः ।

आइसोलेसनया उलेज्या यासें राज्यमन्त्री मानन्धरं अस्पताल संचालनया निंतिं अक्सिजन अनिवार्य जूगु व विगतय् जूगु कमजोरीया कारणं आः समस्या जूगु इलय् अक्सिजनया अभाव जूगु खः धासें आः सरकारं थुकी सुधार हयेमाःगु दु धयादिल ।
येँ मनपा प्रमुख शाक्यं अस्पतालया क्षमता अप्येकेत इनाप यासें संक्रमणया मात्राय् नं म्होति हयेत कुतः यायेमाः धयादिल । लिसें वय्कलं जनताया जीवन रक्षार्थ येँ मनपां लिपांगु इलय् स्वास्थ्य क्षेत्रय् लगानी याना वयाच्वंगु जानकारी नं बियादिल ।

येँ मनपा उपप्रमुख श्रेष्ठं थज्याःगु इलय् येँ मनपां थःगु दायित्व बोध यानाः हे विकास खर्च रोके यानाः जूसां स्वास्थ्य क्षेत्रय् लगानी अप्वयेकागु खः धयादिल ।

येँ मनपा १८ वडाअध्यक्षलिसें आइसोलेसन व्यवस्थापन समितिया संयोजक न्हुछेकाजी महर्जनं फत्तले अस्पतालय् वने म्वायेक व अने हे माःसां सहज रुपं उपचारया व्यवस्था याये धयादिल।

अस्पतालया आयुर्वेद विभागया निर्देशक वासुदेव उपाध्यायं कोभिड संक्रमितया उपचारय् आयुर्वेद पद्दति योगदान जुइ फइगु विश्वास प्वंकादिसें महानगरं उपयोग जुइ मफुगु ज्ञान व सीपयात विस्तार यायेगुलिइ ग्वहालि याःगु धासें उकियात थःपिंसं सिद्ध याना क्यनेगु जुइ धयादिल ।

बैशाख २७ गते जूगु सम्झौताकथं येँ मनपां अस्पतालया निंतिं छक्वः न्यानाः गाःगु उपकरण व मेमेगु स्वास्थ्य सामग्री नापं नियमित रुपं यायेमाःगु खर्चया निंतिं अनुदान बीगु जूगु दु ।

अस्पतालं आइसोलेनया निंतिं आयुर्वेद कन्सल्टेन्ट न्हय्म्ह, आधुनिक चिकित्सक निम्ह, झिंनिम्ह आयुर्वेद चिकित्सक, मेडिकल अधिकृत प्यम्ह, नर्सिंग स्टाफ २२, फिजियो थेरापिस्ट निम्ह, आयुर्वेद स्वास्थ्यकर्मि झिंन्याम्ह, सफाइ व सहयोगी कर्मचारी नीन्याम्ह परिचालन याःगु दु ।