‘नेपाः विदेशी मिस्त मी हइगु गन्तव्य थाय्’

येँ (नेपालभाषा टाइम्स) – नेपाली मिस्तय्त यौन धन्दाया निंतिं मानव तस्करतय्सं भारत लिसें अफ्रिकी देशय् तक मी यंकीगु घटना यक्व पिहां वयाच्वंगु दु। आः वयाः नेपाः विदेशी मिस्त मी हइगु गन्तव्य थाय् नं जुयावःगु दु ।

अमेरिकां पिकाःगु छगू प्रतिवेदनय् बंगलादेशं रोहिन्ज्या मुस्मां मिस्तय्त यौन धन्दाया निंतिं येँय् हयाः मी हइगु खँ सार्वजनिक याःगु दु। रोहिन्ज्या मुस्मांत मुख्यतः म्यानमारयापिं खः । सन् २०१७ य् रोहिन्ज्यात च्वनीगु रखाइन राज्यय् हिंसा तच्वयेवं लखौं ल्याखय् रोहिन्ज्यात बंगलादेशय् शरण काः वनाच्वंगु दु। थथे बंगलादेशय् शरण काः वनाच्वंपिं रोहिन्ज्या मिस्तय्त येँ यौन धन्दाया निंतिं मीहःगु खँ अमेरिकी सरकारया मानव बेचविखन सम्बन्धी प्रतिवेदनय् न्ह्यथनातःगु खः ।

राष्ट्रिय मानव अधिकार आयोगं वि.सं. २०७६ य् पिकाःगु मानव बचेविखन सम्बन्धी छगू प्रतिवेदनय् नं नेपाः मानव बेचविखनया निंतिं स्रोत देय् जक मखु, गन्तव्य देय् व लँपु देय् जूगु खँ न्ह्यथनातःगु दु। आयोगया प्रतिवेदनयात तिबः बीगु कथं अमेरिकी प्रतिवेदनय् रोहिन्ज्या मुस्मांत नेपालय् मी हयाच्वंगु खँ न्ह्यथनातःसां नेपाली अधिकारीतय्सं धाःसा रोहिन्ज्यात नेपालय् मी हःगु स्वीकार याःगु मदु ।

अथेहे नेपाल प्रहरीं यौन धन्दाया निंतिं रोहिन्ज्या मिस्त तस्करी यानाः येँ हल धयागु खँयात नं स्वीकार याःगु मदु। नेपाल प्रहरीया मानव बेचखन अनुसन्धान ब्यूरोया प्रवक्ता एसपी गोविन्द थपलियां बिबिसीयात थुकिया बारे प्रतिक्रिया बिसें बंगलादेशपाखें नेपाःपाखें छुं घटना जूगु दुसां रोहिन्ज्या तस्करी यानाहःगु सीमदुनि धयादीगु दु ।

वय्कलं धयादीगु दु, ‘यौन धन्दालिसे स्वाःगु अज्याःगु घटना बारे जाहेरी लाःगु मदुनि, तर बंगलादेश, पाकिस्तानलिसें छुं देशं मानवतस्करीया घटना धाःसा जूगु दु।’

मानव अधिकार आयोग अन्तर्गतया मानव बेचविखन तथा ओसारपसार विरुद्धया विशेष समाधिक्षक कार्यालयया फोकल पर्सन यशोदा बन्जाडें नं रोहिन्ज्या मिस्तय् नेपालय् तस्करी जूगु घटना वा प्रमाण मलूनिगु खँ धयादीगु दु। वय्कलं धयादीगु दु, ‘न्हूगु प्रतिवेदन ला वये ल्यं दनि । त® जिमिसं आःतक अज्याःगु तथ्य वा घटना लुइकागु मदुनि । नेपाःया लँपु जुयाः मेथाय् यंकी धयागु खँ ला वयाच्वंगु दु। तर रोहिन्ज्यातय्त नेपालय् हे मिउगु धयागु जिमिसं मसिउनि ।’

आयोगया ७६ सलया प्रतिवेदनय् अफ्रिकी देय्या नागरिकतय्त इटलीया निप्पोल यंकेगु धकाः नेपालय् हयाः अलपत्रय् तयाबीगु, चिनियाँ व पूर्वी युरोपया मिस्तय्त थीथी थीथी डान्स बार व यौन व्यवसायय् बन्धक दयेका यौन शोषण यानाच्वंगु व लिपांगु इलय् रोहिन्ज्या शरणार्थीतय्त नेपालय् हयेगु यानाच्वंगु खँ न्ह्यथनातःगु दु। म्यानमारं बिसिउँ वःपिं स्वसःति रोहिन्ज्यात थौंकन्हय् नं नेपालय् च्वनाच्वंगु दु। तर सरकारं उमित शरणार्थीया मान्यता धाःसा बिउगु मदुनि ।

नेपाः सरकारं उमित गैरकानुनी आप्रवासी धाःसां संयुक्त राष्ट्र संघया शरणार्थी स्वइगु निकायं युएनएसीआरया नेपाः ज्याकुथिं धाःसा थ्यंमथ्यं स्वसःत्या रोहिन्ज्यातय्त शरणार्थी परिचयपत्र बीधुंकूगु दु ।

सम्बन्धित बुखँ

LEAVE YOUR COMMENTS