बालेन साह विरुद्ध १५ गते प्रदर्शनया व्यापक तयारी
येँ (नेपालभाषा टाइम्स)÷येँ महानगरपालिकाया मेयर बालेन साहं यानाच्वंगु ज्यादति विरुद्ध माघ १५ गते येँया फिब्व ख्यलय् जुइत्यंगु वृहत् प्रदर्शनीया लागिं व्यापक तयारीया ज्या जुयाच्वंगु दु ।
वकुन्हु न्हिनय् २ बजे फिब्व ख्यलय् मुनाः प्रदर्शन यायेगु तयारी जुयाच्वंगु दु । प्रदर्शनीया संयोजन यानाच्वंगु उपत्यका–व्यापी सडक विस्तार पीडित संघर्ष समितिया संयोजक सुमन साय्मिं कनादी कथं प्रदर्शनय् ब्वति कायेकेगु लागिं मेयर साहपाखें पीडित थीथी थाय्या समुदायलिसे खँल्हाबल्हा जुयाच्वंगु दु ।
उकी खास यानाः तिंख्यः स्यंकाः पार्क दयेकेत्यंगु विरोधय् सक्रिय जुयाच्वंगु पुचः, येँया थाय्मरु त्वालय् त्वाःछेँ थुना छ्वःगु विरुद्ध सक्रिय जूगु पुचः, सतक विस्तारया नामय् गैर कानुनी रुपं डोजर चले याःगु कारणं पीडित पुचः, पार्किङ चीकूगु कारणं पीडित जूपिं व्यापारीत लिसें तुकुचा खुसि खुल्ला यायेगु नामय् जूगु ज्याखँपाखें पीडित पुचःतय्सं ब्यानर सहित ब्वति काइगु खँ धाःगु दु ।
मेयर साहं वंगु छुं ई न्ह्यवंनिसें सुंलिसे सहलह तकं मयासे येँया स्थानीय जनतायात समस्या जुइ कथं ज्याखँ याना वयाच्वंगु खःसा वंगु पुस २८ गते शंखमुलय् स्थानीय जनताया निजी जग्गाय् तकं डोजर चले यानाः जग्गा कब्जा यायेगु कुतः यायेवं स्थानीय जनता वय्कःया विरुद्ध सतकय् वयेमाःगु अवस्था पिहां वःगु खः ।
शंखमुलय् स्थानीय साहेल सिंह महर्जनया जग्गाय् डोजर चले याःगु खँयात येँया ज्यापु महागुथिपाखें नं सरोकार क्यंगु दु । महागुथिपाखें म्हीग येँय् छगू मुँज्या यासें थ्व विषययात गम्भीर रुपं कायेमाःगु खँय् चिउताः प्वंकूगु खः ।
थौंकन्हय् येँय् खास यानाः पिनें वयाच्वंपिं मनूतय्सं थीथी थासय् दुने दुने थ्यंक च्वंगु ४ फिट जक लँ दुगु जग्गा दंक न्यानाः छेँ दनेगु व वयां लिपा गबलें शहरी योजना, गबलें जीएलडी, गबलें नगर विकास धइगु नां तयाः न्ह्यःने लानाच्वंपिं स्थानीय जनताया छेँ व जग्गा सितिकं कयाः लँ तबाला यानाः थःपिनि जग्गाया भाः थकायेगु ज्या यानाच्वंगु सवालय् नं चिउताः प्वंकूगु दुसा अज्याःपिं मनूतय् चंगुलय् येँ महानगरपालिका नं लाः वंगु खँय् गम्भीर जुइमाःगु खँ नं धाःगु दु ।
LEAVE YOUR COMMENTS