कृषकया वा, मीपिं व्यापारी
कृषकयाके वा मदयेधुंकाः सरकारपाखें न्यायेगु घोषणा
येँ – कृषि प्रधान देय् नेपालय् सरकारं कृषक स्वयां नं व्यापारीतय् हितयात ध्यान बियाः ज्या याइगु खँ हानं छक्वः पुष्टि जूगु दु । कृषकतय्सं पिना तःगु वा विदेशय् मवनेमा धकाः सरकारं थःपिंसं हे न्याना कायेगु नीति दयेकूगु खः । तर सरकारं कृषकतय्गु वा न्याना कायेगु ज्या अबले वयाः तिनि शुरु यात गबले कि कृषकतय्के वा हे मदयेधुंकल ।
पश्चिम नेपाःया महेन्द्रनगर, धनगढी, रामपुर आदि लागाय् च्वंपिं कृषकतय्गु वा न्यायेगु धकाः सरकारं नकतिनि घोषणा याःगु दु । अनया कृषकतय्सं थःपिनिगु वा धाःसा भण्डार यायेगु थाय् मदुगुलिं वंगु महिनाय् हे दंगु भावं व्यापारीतय्त मीधुंकल । आः वयाः सरकारं कृषकतय्सं मिउगु भाः स्वयां अप्वः ध्यबा बियाः वा न्याना कायेगु धकाः घोषणा याःगु दु ।
सरकारं याःगु थ्व घोषणाया लबः धाःसा दथुइ च्वनाः वा न्यानातःगु गैर कृषकतय्सं जक काये फइगु खँ सम्बद्ध कृषकतय्सं धाःगु दु ।
सरकारं थ्व दँय् ३० हजार मेट्रिक टन वा न्याना कायेगु निर्णय याःगु खः । पश्चिम नेपाःपाखे न्हापां वा लइगु जूगुलिं आःयात अन निं वा न्याना कायेत्यंगु खःसा थ्वयां लिपा पूर्वी तराई लागाय् नं वा न्यायेगु शुरु जुइ धाःगु दु ।
अन नं वा न्यानाः भण्डारण यायेगु लागिं सरकारं ततःधंगु गोदाम दयेकाच्वंगु दु । नेपालय् उत्पादन जुइगु वा विदेश मवनेमा धकाः सरकारं नेपाली कृषकतय्गु वा न्यानाः नेपालय् हे थाकेगु नीति काःगु खः ।
थ्व नीति कथं तप्यंक कृषकतय्के हे वा न्याना काःगु जूसा उकिं बुँज्या याइपिं कृषकत लाभान्वित जुइगु खः । तर फुक्क कृषकतय्सं व्यापारीया ल्हातय् वा मीधुंकाः तिनि सरकारं थःपिंसं वा न्यायेगु धकाः घोषणा याःगुलिं थुकी नं व्यापारी व सम्बद्ध सरकारी कर्मचारीया साँठगाँठ दुगु आशंका याःगु दु ।
नेपाःया वा, भारतया जाकि
नेपाः छगू कृषि प्रधान देय् खःसां नेपालं थःत माःगु जाकि धाःसा दँय्दसं विदेशं आयात याये मालाच्वंगु दु । नेपालं हरेक दँय् २० अर्ब तकाया जाकि भारतपाखें आयात यानाच्वंगु दु । तर नेपालं भारतपाखें गुगु जाकि आयात याइगु खः, उगु जाकियात माःगु वा धाःसा नेपालं हे उखे वनीगु खः ।
सीमावर्ती लागाय् नेपाःया किसानतय्सं वा लये सिधयेवं हे भारतीय व्यापारीत वयाः न्याना यंकी । नेपाःया किसानतय्के दंगु भावं न्याना यंकूगु वहे वायात उमिसं जाकि दयेकाः हानं नेपालय् तुं निर्यात याना हइगु खः । थुकिं यानाः छखे नेपाःया किसानत मर्काय् लानाच्वंगु दुसा मेखे नेपालय् कृषिजन्य उद्योग धरासायी जुइगु व नेपालं व्यापारघाटा नं फये मालाच्वंगु दु ।
LEAVE YOUR COMMENTS