मिसा साहित्यकार मुना नीस्वन
येँ- नेपालभाषा साहित्य ख्यःयात च्वन्ह्याकेगु तातुनाः न्हूपिं मिसा साहित्यकारपिं संगठित जूगु दु । नेपालभाषा साहित्य ख्यलय् न्हूपिं साहित्यकार, मिसा च्वमिपिंत संगठित यायेगु तातुनाः ‘मिसा साहित्यकार मुना’ नांयागु संगठन चायेकूगु दु ।
साहित्यह्यःमि अञ्जना ताम्राकारया अध्यक्षताय् गठन याःगु संस्थाय् दिव्या ताम्राकार व विमलप्रभा वज्राचार्य न्वकुकथं च्वनादीगु दुसा विमला मानन्धर मूछ्याञ्जे, राजेश्वरी राजोपाध्याय लिउछ्याञ्जे, भवानी तुलाधर दांभरिं व रेणु श्रेष्ठ लिउ दांभरिंकथं च्वनादीगु दु ।
अथे हे मू दुजलय् निजिरोस श्रेष्ठ, पूर्णिमा शाक्य, रिता महर्जन, मिलन शाक्य, मिनर्भा शर्मा, अर्चना शाक्य, मिमला शर्मा, दिपना शर्मा, दिव्या वज्राचार्य च्वनादीगु दु ।
संस्थापाखें आः नकतिकि जक नेपालभाषा साहित्य ख्यलय् अतिकं नुगः क्वसाःम्ह व्यक्तित्वनापं भाषासेवी डा. ज्योतिप्रभा तुलाधरयात संरक्षककथं ल्यःगु दु । डा. तुलाधरयात संरक्षककथं ल्ययाः वय्कःयात लसकुस यायेत ग्वसाः ग्वःगु ज्याझ्वलय् न्याम्ह मिसा साहित्यकारं चिनाखँ नं वाचन याःगु खः ।
ज्याझ्वलय् वाचन जूगु चिनाखँयात संस्थाया संरक्षक डा. तुलाधरं समीक्षा नं यानादीगु खः ।
थुगु संस्थापाखें नःलिपिं मिसा च्वमिपिंत हःपाः बीगु, मिसा साहित्य खःयात तब्या यायेगु, समीक्षकपिंपाखें न्हूपिं च्वमिपिंत साहित्यया थीथी पक्षया बारे जानकारी व मिसा च्वमिपिनिगु सफू पिथनेगु उद्देश्य जूगु नं जानकारी बिउगु दु ।
LEAVE YOUR COMMENTS