
तोखा(नेपालभाषा टाइम्स)- येँया उत्तरी भेगय् लाःगु ऐतिहासिक नेवाः वस्ती तोखाया नांजाःगु धार्मिकस्थल सपन तीर्थयात संरक्षण, संवद्र्धन व प्रवद्र्धन यायेगु ल्याखं तोखा नगरपालिकां थीथी ज्वलं ग्वाहालि याःगु दु । नगरपालिकांसपन तीर्थ क्षेत्र संरक्षण विकास समिति द्यः खलःयात थीथी हलंज्वलं ग्वाहालि याःगु खः ।
तोखा नगरपालिकां सपन तीर्थ क्षेत्र विकास समिति द्यः खलःया ज्याकू व्यवस्थापनया निंतिं कम्प्युटर छगः, प्रिन्टर छगः, अफिस टेबुल निगू, मेच निगू, प्लाष्टिकया मेच नीगू, स्टिल दराज स्वंगः, स्प्रे मेसिन छगू, घाँय् चायेगु मेसिन छगःलिसें मेमेगु ज्वलं लःल्हाःगु खः ।समितिया व्यवस्थापनया निंतिं नगरपालिकां उपलब्ध याकूगु इपिं ज्वलं २ वडाअध्यक्ष धर्मेन्द्र श्रेष्ठं समितिया नायः देवराज डंगोलयात लःल्हानादीगु खः ।
उगु इलय् वडाअध्यक्ष श्रेष्ठं तोखाया नांजाःगु धार्मिकस्थल जःखःया विकास व संरक्षणया निंतिं नगरपालिकालिसें वडापाखें नं फक्व ग्वाहालि यायेगु प्रतिवद्धता प्वंकादिल । लिसें वय्कलं वडापाखें बजेटया व्यवस्था याना बिउसां समितितय्सं ज्या मयायेगु व याःसां आर्थिक अनियमितता यायेगु ज्या जुयाच्वंगु खँय् असन्तुष्टि नं प्वंकादिल ।
समितिया नायः डंगोलं हलंज्वलं ग्वाहालिया निंतिं नगरपालिकायात सुभाय् देछानादिसें स्थानीय, प्रदेशलिसें संघ मातहतया थीथी मन्त्रालय, विभागया पहलय् आवश्यक बजेट व्यवस्थापन यानाः देगः परिसरया थीथी भौतिक संरचना व पूर्वाधार निर्माण यायेगु ज्या जुयाच्वंगु जानकारी बियादिल ।
समितिया पुलांम्ह नायःलिसें सल्लाहकार अष्टनारायण डंगोलं देगः परिसरय् च्वंगु पुखूया संरक्षण याना तयेत पुखुलिइ आवश्यक जुइगु लःया निंतिं डीप बोरिङ यायेमाःगु आवश्यक जूगु व उकिया निंतिं माःगु व्यवस्था मिले यायेत वडाअध्यक्षया ध्यानाकर्षण याकादिल । लिसें वय्कलं तोखा नगरया दक्वं धार्मिक, सांस्कृतिक, ऐतिहासिक महत्वया सम्पदा संरक्षणया निंतिं स्थानीय सरकारं विशेष प्राथमिकता बीमाःगु व उकिया निंतिं आवश्यककथं बजेट व्यवस्था यायेत नं सुझाव बियादिल ।
LEAVE YOUR COMMENTS