कांग्रेसपाखें सभामुख दावी !
एकीकरण लिपा सभामुख उपसभामुख छगू हे पार्टीइ लात
येँ – एमाले व माओवादी निगू दल एकता लिपा छगू हे जुइधुंकाः आः प्रतिनिधिसभाया सभामुख वा उपसभामुख निगू मध्ये छगू पद विपक्षी दलयात बीमाःगु माग नेपाली कांग्रेसं याःगु दु ।प्रतिनिधिसभाया सभामुख वा उप–सभामुख मध्ये छगू पद विपक्षीयात बीमाः धकाः संविधानय् हे व्यवस्था यानातःगु जुयाः कांग्रेसं थ्व दावी याःगु खः ।
एमाले व माओवादी एकीकरण जुइ न्ह्यः सभामुख माओवादीं काःगु खःसा उपसभामुख एमालें काःगु खः । आः थ्व निगुलिं पार्टी छगू जुइधुंकूगु कारणं छगू पद विपक्षीयात बीमाःगु माग कांग्रेसं याःगु खः । तर निगू पार्टी एकीकरण लिपा छगू जूगु नेपाल कम्युनिष्ट पार्टीं धाःसा पार्टी एकता लिपा छगू पद त्वःतेमाःगु आवश्यकता मदु धाःगु दु ।
नेकपा सूत्रं धाः कथं सभामुख व उपसभामुख नियुक्त जुइधुंकाः वय्कःपिं निम्हं नेतातय्सं थःथःगु पार्टी त्याग यानाः स्वतन्त्र
हैसियत प्राप्त यायेधुंकूगु कारणं आः सु छु पार्टीयाम्ह धकाः विवाद यानाच्वने माःगु आवश्यकता मदु धाःगु दु । सुं नं नेता सभामुख वा उपसभामुख पदय् नियुक्त जुइधुंकल कि निष्पक्षताया लागिं उमिसं पार्टी परित्याग यायेमाःगु चलन दु ।
कांग्रेसं धाःसा संसदय् समेत थ्व मागयात न्ह्यःने तसें यदि सभामुख वा उपसभामुख मध्ये छगू पद विपक्षीयात मबीगु खःसा नेपाल कम्युनिष्ट पार्टीं सदनय् एकदलीय तानाशाही चले यायेत्यंगु पुष्टि जुइ धकाः नं ख्याच्वः बिउगु दु । संसदय् मुक्कं न्यागू जक राष्ट्रिय दल दुगुली एमाले व माओवादी एकीकरण जुयाः छगू जूगु व संघीय समाजवादी फोरम नं सरकारय् दुहां वंगुलिं आः विपक्षी बेञ्चय् कांग्रेस व राजपा जक ल्यं दनि ।
निगू वाइसीएल नं एकतापाखे
एमाले व माओवादी एकीकरण लिपा आः निगुलिं पार्टीया युवा संगठनत नं एकीकरण यायेगु तयारी सुरु जूगु दु । उकिया निंतिं युवा संघ नेपाल व योङ कम्युनिष्ट लिग (वाइसीएल) एकीकरण निंतिं नीस्वंगु कार्यदलं थ्वहे वइगु जेठ ३० गते संघया स्थायी कमिटीया बैठक सःतगू दु ।
पार्टीं युवा संघया इन्चार्ज महेन्द्रबहादुर पाण्डे, वाइसीएलया इन्चार्ज मणि थापा व युवा संघया अध्यक्ष रमेश पौडेल व वाइसीएलया अध्यक्ष रामप्रदसाद सापकोटा (दीपशिखा) दुथ्याःगु कार्यदल गठन याःगु खः । एकीकरया निंतिं माक्र्सवाद व लेनिनवादयात सैद्धान्तिक आधार दयेकेगु व देय्न्यंकंया संगठनय् शक्ति पृथकीकरणया अभ्यास यायेगु सहमति जूगु दु ।
निगू पार्टी एकीकरण लिपा थुपिंलिसे आवद्ध पत्रकार संघतय्गु नं उकुन्हु तिनि एकीकरण जूगु खः ।
LEAVE YOUR COMMENTS