वरिष्ठ समालोचक इन्द्र माली मंत

येँ – नेपालभाषा साहित्यया नांजाःम्ह समालोचक भाजु इन्द्र माली थौं सुथय् मंत । वय्कः ताः ई न्ह्यवंनिसें नुगःचु सम्बन्धी ल्वचं ग्रस्त जुया च्वनादीम्ह खः । म्हिगः आकाझाकां अक्सिजन लेबल म्हो जुयाः वय्कःयात शहीद गंगालाल राष्ट्रिय हृदय रोग केन्द्रय् वासः याकेत हःगु खः ।

थौं सुथय् ७ बजेपाखे वासः याकुयाकुं वय्कः मदुगु खँ छेँजःपिंसं धाःगु दु । वय्कःयात कोरोनाया संक्रमण समेत खने दुगु खः । कोरोना संक्रमण खने दुगुलिं थौं वय्कःया अन्त्येष्टि धाःसा नेपाली सेनां यायेत्यंगु दु । सेनां पशुपतिइ वय्कःया अन्त्येष्टि याइगु खँ धाःगु दु ।
भाजु इन्द्र मालीं नेपालभाषा साहित्यया समालोचना विधाय् विशेष योगदान यानादीगु दु । लिपांगु इलय् वय्कलं काव्यय् नं हाइकु विधाय् विशेष अध्ययन यानाच्वनादीगु खः ।

वय्कः नेपालभाषा एकेडेमिया पुलांम्ह सदस्य सचिव खः । वय्कलं नेपालभाषाय् तःजिगु खँग्वःधुकू नं पिथनादीगु दु । दोल्खाया नेपालभाषा विषयय् तःजिक अध्ययन यानादीम्ह वय्कःया समालोचना सम्बन्धी तःगूमछि सफू नं पिदंगु दु ।

नेपाल सरकारया थीथी मन्त्रालयय् वय्कलं उपसचिव जुयाः नं तःदँ सेवा यानादीगु दु । लिपांगु इलय् वय्कः राजपरिषद्या उपसचिव जुयाः सेवा निवृत्त जुयादीगु खः । राजदरवार हत्याकाण्ड जूगु इलय् वय्कः राजपरिषद्य् हे कार्यरत जुयादीगु खः ।