सिख्वंमू बहालय् अमोघपाश लोकेश्वर साधना पुजा

येँ- श्रीखण्ड तरुमूल महाविहार (सिख्वंमू बहाः) या ग्वसालय् अमोघपाश लोकेश्वरया साधनासहितिया पुजा जूगु दु । थनया बसन्तपूस्थित कुमारि छेँया नापसं च्वंगु महाविहारय् न्हापांखुसी उकथंया पुजा ज्याझ्वः जूगु खः । कश्यप बुद्धया पालंनिसें शुरु जूगु धइगु विश्वास यानातःगु उपोसथ व्रत वज्रयान विधिकथं मन्त्रोचारण यानाः याःगु खःसा थुगु व्रत च्वंपिंत बोधिज्ञान लाभ जुइ धइगु धार्मिक मान्यता दया वयाच्वंगु दु । बुद्ध, धर्म व संघया आह्वान यासें बुद्ध मण्डल, धर्म मण्डल व संघ मण्डलया वज्रयान विधिकथं मन्त्रोचारण यानाः पुजा याःगु खः ।

बौद्ध विद्वान मञ्जुश्रीरत्न वज्राचार्य कनादीकथं काश्यप बुद्धया इलनिसें हे अमोघपास लोकेश्वरया उपोसथ व्रत च्वनेगु प्रचलन धया वयाच्वंगु दु । वय्कलं धयादीकथं बुद्ध धर्मय् प्रज्ञापारमिताया विशेष महत्व दुगु व थुकिया ज्ञान प्राप्तिपाखें जन्मनिसें मृत्युतकया चक्र त्वाःदली धइगु विश्वास यानातःगु दु । उपोसथ व्रत व विशेष पुजाय् मिसा व मिजं यानाः झिप्यम्ह अमोघपाश लोकेश्वरया व्रत च्वंगु खः ।

वशिष्ठ नांया छम्ह ब्राम्ह्णं सछिदँ तक थःगु शरीरयात हे दुःख कष्ट जुइकथं कठिन व्रत काःगु व थुलि यानाः नं निर्वाण प्राप्त याये मफयेवं असन्तुष्ट जूम्ह उम्ह ब्राम्हणं शाक्यमुनि बुद्धयात थुकिया कारण न्यंगु व लिपा शाक्यमुनि बुद्धं अमोघपास लोकेश्वरया उपोसथ व्रत काल धाःसा निर्वाण प्राप्त जुइ धइगु सन्देश बियाबिज्यायेवं ब्राम्हण सन्तुष्ट जूगु धइगु बाखं अमोघपास लोकेश्रया बाखनय् धयातःगु दु ।