विश्व नेवाः दिवसया व्यापक तयारी

येँ – थ्वहे वइगु शुक्रवाः येँय् जुइगु विश्व नेवाः दिवसया तयारी ज्या यायेगु लागिं ग्वसाः खलः वल्र्ड नेवाः अर्गनाइजेशन (डब्लुएनओ) या पदाधिकारीत येँय् वयेगु शुरु जूगु दु । वय्कःपिं येँय् थ्यनेवं नियमित बैठक च्वनाः नेवाः दिवसया तयारी ज्या शुरु यानाच्वनागु खँ ग्वसाः खलःया दुजः दयारत्न शाक्यं ‘नेपालभाषा टाइम्स’ यात कनादिल । निन्हुयंकं जुइगु उगु सम्मेलनय् नेवाः जातिलिसे सम्बन्धित भाषा, संस्कृति, संगठन, इतिहास, आन्दोलन, फिल्म आदि विषयक १८ गू ज्यापौ न्ह्यब्वइगु खँ नं वय्कलं कनादिल । ज्याझ्वलय् प्रमुख वक्ताया रुपय् डा. त्रिरत्न मानन्धरं सम्बोधन यानादी । थ्वहे झ्वलय् उगु हे सम्मेलनयात ध्यानय् तयाः नेपालभाषा एकेडेमिपाखें स्वन्हुयंकं नेपालभाषाया सफू ब्वज्या नं याइगु जूगु दु । ज्याझ्वः जुइगु थाय् नेपाः ब्यांक्वेटय् एकेदेमिया उगु सफू ब्वज्या जुइ । उकिया उलेज्या डब्लुएनओया नायः सिजन श्रेष्ठं यानादी ।

नेपालय् थ्व सम्मेलन जुयाच्वंगु हे इलय् विश्वया मेमेगु नं थीथी देशय् नापं हे नेवाः दिवस हनाच्वनीगु खँ ग्वसाः खलकं धाःगु दु । भाजु शाक्यं कनादी कथं आः तक विश्वया १५ गू स्वयां अप्वः देशय् नेवाः दिवस हनीगु जानकारी वयेधुंकूगु दु । येँय् जुइगु सम्मेलनं नेवाःतय् उत्थानलिसे सम्बन्धित थीथी घोषणा जुइफुगु खँ नं धाःगु दु ।ग्वसाः खलकं थ्वकुन्हु विश्वया न्ह्यागु थासय् च्वनाच्वंपिं नेवाःतय्सं नं थःथः मुनाः नेवाः जातिया बारे चर्चा परिचर्चा यासें थ्व दिवस हने फइगु खँ धाःगु दु । येँय् निन्हुयंकं ज्याझ्वः यायेधुंकाः वयां लिपा दँय्दसं मार्च महिनाया अन्तिम शनिवाः विश्वन्यंकं नेवाः दिवस हनेगु प्रस्ताव तःगु दु ।