ने. सं. ११४४ कौलाथ्व पारू - नःलास्वनेगु

भायया निंतिं मतिनामी त्याग यानादीम्ह प्रा माणिकलाल

येँ – प्राध्यापक माणिकलाल श्रेष्ठं भाषा प्रेमं यानाः थःगु प्रेमजीवन तकं त्याग यानादीगु खँ धाःगु दु । मदुम्ह प्रा. श्रेष्ठया शनिवाः जूगु बिचाः मुँज्या न्ववानादिसें नेवाः न्ह्यलुवा मल्ल के सुन्दरं थ्व खँ धयादीगु खः । ‘यक्वसिनं थ्व खँ मसिउ जुइ’ वय्कलं धयादिल, ‘तत्कालिन येँ नगरपञ्चायतया चुनावया झ्वलय् वडा नं. ९ या वडा अध्यक्षया चुनावय् वय्कः थःगु हे पार्टीया थः हे पासा शुम्भराम श्रेष्ठविरुद्ध बागी उम्मेदवार जुयाः दनादिल । अबलय् कम्युनिष्ट पार्टीं थःगु घोषणापत्रय् बहुभाषी नीति उल्लेख मयात । थुकिया विरोध यासें प्राध्यापक श्रेष्ठं घोषणापत्रय् हे स्थानीय भाय् वडाय् छ्यलेगु उल्लेख यायेमाः धयादिल । उगु इलय् पार्टी हे लगे जुयाच्वंम्ह छम्ह मिसालिसे वय्कःया मतिना ब्यानाच्वंगु खः, अले पार्टी हे निम्हेसिया ब्याहा यानाबीगु क्वःछिनातये धुंकूगु खः ।

प्रा. श्रेष्ठं वडाय् स्थानीय भाय् छ्यलेगु उल्लेख मयासे घोषणापत्र दयेकूगुलिं उकिया विरोध यानाः पार्टीया आधिकारिक उम्मेदवार थः हे पासा शम्भुराम श्रेष्ठविरुद्ध वय्कलं उम्मेदवारी बियादिल । पार्टीं उम्मेदवारी मबीत दबाब बिल । वय्कःया मतिनामियात नं दबाब बिल । वय्कःया मतिनामिं कि उम्मेदवारी त्वःती, कि मखुसा जितः त्वःती धकाः धाल । वय्कलं थःगु भाय्या मतिनां थः मतिनामियात हे त्याग यानादिल । अले उम्मेदवार जुयाः वडा अध्यक्षय् त्याका नं दिल ।’

‘थःगु सिद्धान्त, थःगु भाय्प्रतिया मतिनां थःगु प्रेम जीवन तकं त्याग यानादीम्ह वय्कः प्रति झी नतमस्तक जुइमाः, अले वय्कःयात राष्ट्रं सम्मान बीकेगु निंतिं वय्कःया किपा तयाः हुलाक टिकट पिकायेगु कुतः झीसं यायेमाःगु दु’ भाजु मल्लं धयादिल ।

ज्याझ्वलय् न्ववानादिसें वाम बुद्धजीवी श्याम श्रेष्ठं नं प्रा. माणिकलाल श्रेष्ठयात राष्ट्रं सम्मान बीकेगु निंतिं वय्कःया किपा दुगु हुलाक टिकट पिकायेमाःगु खँ धयादीगु खः । अथेहे वय्कलं प्रा. श्रेष्ठं च्वयादीगु लेख रचनात दक्व मुंकाः सफू पिथनेमाःगु बिचाः नं तयादीगु खः ।

आदिवासी जनजाति नेता सुरेश आलेमगरं प्रा. श्रेष्ठ गुगु सिद्धान्तय् न्ह्यावंगु खः, उगु लँय् न्ह्याः वनेफःसा धाथें वय्कःयात श्रद्धाञ्जली बिउगु जुइ धयादिल । अथेहे नेपालभाषा केन्द्रीय विभागया प्रमुख डा. ओमकार श्रेष्ठं प्रा. श्रेष्ठया बौद्धिक व प्राज्ञिक व्यक्तित्वयात कयाः चर्चा यानादीगु खः ।

बिचाः मुँज्याय् प्रा. श्रेष्ठया काय मलखलाल श्रेष्ठं वय्कलं थःपिंत न्ह्याबलें नं थःगु मांभाय् नेवाः भाय् त्वःते मजिउ धकाः धयादीगु खँ लुमंकादिसें धयादिल, ‘जिपिं युरोपय् च्वंच्वनागु स्वीदँ दयेधुंकल, अय्सां जिमिसं युरोपय् थः छेँजः दथुइ नेवाः भाय् हे ल्हायेगु याना ।’

‘मनूतय्गु बिचाः थःथःगु जुइ, राजनीतिक बिचारधारा नं बिस्कं बिस्कं जुइफु, तर भाय्या निंतिं सकलें छप्पँ जुइमाः । बाःया बिचाः नं थ्व हे खः । वय्कःया राजनीतिक बिचारधारा थःगु हे दुसां भाय्या निंतिं वय्कलं न्ह्यागु पार्टीयापिंत नं ग्वाहालि यानादिल’ वय्कलं धयादीगु दु ।

ज्याझ्वलय् वय्कलं प्रा. श्रेष्ठया स्मृति ग्रन्थ पिकायेगु निंतिं थःपिंसं माःगु ग्वाहालि यायेगु खँ न्ह्यथँसें प्रा. श्रेष्ठया नामं प्रतिष्ठान चायेकेगु खँ नं धयादीगु खः । नेवाः देय् दबूलिसें थीथी संघसंस्था जानाः मंकाः कथं याःगु बिचाः मुँज्याय् सभानायः थासं न्ववानादिसें दबूया नायः नरेश ताम्राकारं नं प्रा. श्रेष्ठया व्यक्तित्वयात कयाः चर्चा यानादीगु खः ।