सिन्दुराकार खलःया मुना

येँ – उदाय समुदाय दुनेया छगू कवः यतखा त्वाः निवासी सिन्दुराकार खलःया मुना ज्याझ्वः वंगु शनिवाः जुल । यतखाया पतांगिनि गणेद्यःयाथाय् जूगु ज्याझ्वःया उलेज्या सिन्दुराकार खलःया संरक्षक पद्मराज सिन्दुराकारं सुकुन्दाय् मत च्याकाः यानादीगु खः ।

खलःया नायः सुरेन्द्रकाजी सिन्दुराकारया सभापतित्वय् न्ह्याःगु ज्याझ्वलय् खलःया छ्याञ्जे सुगतरत्न सिन्दुराकारं उदाय समाजं उदाय समुदाययात गुकथं व्यवस्थित यानातःगु दु धइगु बारे जानकारी बियादीगु खः । ज्याझ्वलय् खलःपाखें समाजय् प्रतिनिधित्व यानाच्वनादीम्ह मय्जु गौरीशोभा सिन्दुराकारं समाज व समाज अन्तर्गया मिसा पुचलं न्ह्याका वयाच्वंगु थीथी गतिविधिया बारे जानकारी बियादीगु खः ।

अथेहे खलःपाखें संस्थागत प्रतिनिधित्व यानाच्वनादीम्ह माणिकरत्न सिन्दुराकारं उदाय समाजं याना वयाच्वंगु ज्या व योजनाया बारे कनादीगु खः । उगु मुनापाखें गौरीशोभा सिन्दुराकारया संयोजकत्वय् झिम्ह दुजः दुथ्याःगु छगू मिसा कवः नं गठन याःगु खः । ज्याझ्वलय् पुष्पराज सिन्दुराकार, जिनेश सिन्दुराकार, ज्वाहारशोभा सिन्दुराकारं थःथःगु नुगःखँ प्वंकादीगु खःसा भेलां याकनं खलःया दँमुँज्या यायेगु व खलःया ज्याथजिथिपिंत नं हनेगु निर्णय याःगु खः ।

सम्बन्धित बुखँ

LEAVE YOUR COMMENTS