ने. सं. ११४४ कौलाथ्व तृतीया -

किपूया सांस्कृतिक संरक्षित क्षेत्र सम्बन्धी ऐन वल

येँ – नेपाःया संविधान व स्थानीय सरकार संचालन ऐन कथं नं स्थानीय रुपं नेवाःतय्गु यक्व कथंया मागयात सम्वोधन याये फइगु अवस्था दु धकाः किपू नगरपालिकां क्यंगु दु । स्थानीय सरकार संचालन ऐनय् स्थानीय तहतय्सं नं सांस्कृतिक संरक्षित क्षेत्र घोषणा याये फइ धकाः तयातःगु व्यवस्थाया लिधंसाय् किपू नगरपालिकां स्थानीय राजपत्रय् किपू नगर सांस्कृतिक संरक्षित क्षेत्र सम्बन्धी ऐन प्रकाशित याःगु दु ।

प्रथाजन्य संस्था गुथिया प्रतिनिधित दुथ्याकाः सांस्कृतिक संरक्षण सम्वद्र्धन यायेगु नितिं ज्या न्ह्याकेत उगु ऐन हःगु खः । ऐनय् किपू लागा, पांगा लागा, नगां लागा, च्वबाहाः लागा, गांचा लागा व भाजंगाः लागा यानाः खुगू लागाय् उप परिषद् व नगरस्तरीय परिषद् दयेकेगु व्यवस्था यानातःगु दु । किपू नगरपालिकां श्रीकृष्ण महर्जनया नेतृत्वय् छुं महिना न्ह्यः जक किपू नगर सांस्कृतिक संरक्षित क्षेत्र घोषणा तयार यायेगु नितिं अध्ययन कार्यदल दयेकूगु खःसा वहे कार्यदलं बिउगु प्रतिवेदनया लिधंसाय् नगरसभां ऐन पारित यानाः आः राजपत्रय् पिथंगु खः ।

नेपाःया संविधान, स्थानीय सरकार संचालन ऐन, आइएलओ–१६९ नापं युएनड्रिपया आधारय् उगु ऐन दयेकागु खँ स्पष्ट रुपं प्रस्तावनाय् हे च्वयातःगु दु ।

किपू नगरपालिकां सांस्कृतिक संरक्षणया नितिं ऐन राजपत्रय् पिथंगु ज्यायात कार्यदलया कजि श्रीकृष्ण महर्जनं च्वयादीगु दु । संघीय संरचनाया मोडल कथं थःपिंसं यानागु प्रस्तावयात हे स्वीकार यायेगु ज्या किपू नगरपालिकाया जनप्रतिनिधितय्सं यानादिल धासें वय्कलं किपुली नेवाःतय्गु प्यंगू लागा किपू, नगां, पांगा व च्वबाहाःयात सांस्कृतिक संरक्षित क्षेत्र घोषणा यायेमाः धकाः प्रस्ताव यानागुयात किपू नगरपालिकाया जनप्रतिनिधितय्सं भाजंगाः व गांचा लागायात नं थपे यानाः खुगू लागा दुथ्याकेगु ज्यायात बांलाःगु ज्या धकाः च्वछायादिल ।

आः राजपत्रय् हे थ्व ऐन प्रकाशित जूगुलिं किपुली छगू न्हूगु कथंया ज्या जूगु खँ धाःगु दु । थुकिं यानाः किपूया नेवाःतय्गु प्रथाजन्य संस्थायात स्थानीय सरकारया मान्यता प्राप्त जूगु दु । स्थानीय सरकारपाखें प्रथाजन्य संस्थायात मान्यता बीगु ज्यापाखें नेवाः संस्कृति ताः ई तक ल्यना च्वनीगु नापं नेवाःतय्सं थःपिनिगु संस्कृतियात ल्यंका तयेगु नितिं नं लँपु चालीगु खँ धाःगु दु । आः थुकियात कार्यान्वयन यायेगु चुनौति दु, उकिया नितिं जनप्रतिनिधि, गुथिया प्रतिनिधि नापं कार्यदलया प्रतिनिधित च्वनाः ब्यापक रुपं सहलह ब्याका वनेमाःगु आवश्यकता दुगु खँ नं थनया विज्ञ नेवाःतय्सं धयाहःगु दु ।