सिलु मेला शुरु

येँ(नेपालभाषा टाइम्स)- प्रसिद्ध धार्मिक व पर्यटकीयस्थल सिलुइ मेला शुरु जूगु दु । रसुवा जिल्लाया सिलुइ गुंपुन्हिकुन्हु विशेष मेला जुइ ।

गोसाइँकुण्ड क्षेत्र विकास समितिं थुगुसी करिब झिंन्याद्वःनिसें झंच्याद्वःया ल्याखय् तीर्थयात्री वइगु अनुमान याःगु दु । थगुने करिब झिंस्वद्वःया ल्याखय् मेलाय् सहभागि जूगु समितिं जानकारी बिउगु दु ।

थुगुसी रसुवातक वयेगु लँपुइ गनं नं सतक अवरुद्ध मजूगु, पदमार्ग नं सुरक्षित जूगुलिं सिलु मेलाय् वइपिं भक्तजनया ल्याः अप्वयेफुगु समितिं धाःगु दु । थन नागंचमिनिसें हे मेला लगे जुइगु खःसां विशेष यानाः गुंपुन्हिकुन्हु तःधंगु हे मेला जुइ । मेलाया निंतिं तीर्थयात्रीत वयेगु क्रम नं शुरु जुइधुंकूगु समितिं न्ह्यथंगु दु ।

सिलु मेलाय् वइपिं तीर्थयात्रीयात च्वनेगु व नयेगु निंतिं थाय्या नं व्यवस्था यानातःगु दु । होटल व्यवसायी संघ रसुवाया अध्यक्ष निशन गजुरेलं मेलाय् वइपिं तीर्थयात्रीतय् सुविधाया निंतिं नयेगु व च्वनेगु थाय्या व्यवस्था यायेत ७० गू स्वयां अप्वः थर्पु निर्माण यानागु जानकारी बिउगु दु ।