सीके राउतयात सहानुभूति तयाच्वंगु राष्ट्र संघया ज्याकू बन्द याकल

सरकारं नेपाःस्थित राष्ट्र संघीय ज्याकू दुने चायेकातःगु छगू ज्याकूयात बन्द याकूगु दु । डिपार्टमेन्ट अफ पोलिटिकल अफेयर्स (डिपीए) धाइगु थ्व ज्याकू पुल्चोकय् च्वंगु संरासंया ज्याकू दुने चायेकातःगु खः । थ्व ज्याकूया मू ज्या नेपाःया राजनीतिक घटनाक्रमयात न्यूयोर्कय् च्वंगु राष्ट्र संघया मू ज्याकुथिइ छ्वयेगु खः धाःगु दु ।

थ्व ज्याकुथिं अलग तराईया माग याना वयाच्वंम्ह सीके राउतयात सहानुभूति तयाच्वंगु व सीके राउतयात ग्वाहालि यानाच्वंगु देय्त लिसे अघोषित रुपं सहकार्य यानाच्वंगु धासें सरकारं थुकियात बन्द याकूगु खः । अथेहे थ्व ज्याकुथिइ ज्या यानाच्वंपिं कर्मचारीतय्त नं स्वला दुने लिहां वनेत निर्देशन बिउगु दु ।

नेपाःया शान्ति प्रक्रियाय् ग्वाहालि यायेत वःगु अनमिनं थःगु ज्या क्वचाये धुंकाः छुं ईया निंतिं धकाः डिपीए चायेकूगु खःसां न्हय्दँ तक थ्व निरन्तर न्ह्यानाच्वंगु खः । थ्व ज्याकुथिइ नेपाःया तःम्ह हे पत्रकारतय्सं आकर्षक तलब नयाः ज्या यानाच्वंगु दु ।
मन्त्रिपरिषद्या निर्णय कथं ज्याकू बन्द यायेत सरकारं न्यूयोर्कय् च्वंगु संरासंया मू ज्याकुथिइ पौ छ्वयेधुंकूगु दु ।