ख्वप लाय्कूयात हरियाली दयेकेगु अभियान

ख्वप – ख्वप नगरपालिकां ख्वप लाय्कू लागायात हरियाली दयेकेगु अभियान न्ह्याकूगु दु । नगरपालिकां विश्व सम्पदाया धलखय् दुथ्यानाच्वंगु ख्वप लाय्कू लागायात हरियाली दयेकेत थीथी जातया स्वांसिमा पीगु ज्या याःगु खः । पर्यटकतय् निंतिं छगू प्रमुख गन्तव्यया रुपय् दयाच्वंगु थनया लाय्कू लागायात हरियाली प्रवद्र्धन यायेगु उद्देश्यं उकथंया अभियान न्ह्याकूगु खः ।

नगरप्रमुख सुनील प्रजापतिं लाय्कू लागाय् तयातःगु गमलाय् थीथी जातया स्वां व हरियाली जुइगु स्वां पुसा पिनादीगु खः। नगरपालिकां नगरया दिगो विकासया अवधारणाकथं नगरया थीथी क्षेत्रय् ल्वहंतं सीगु ज्या जुयाच्वंगु जानकारी बियादिसें नगरप्रमुख प्रजापतिं ख्वप देय् भौगोलिक रुपं चीधं जूसां नं ऐतिहासिक, धार्मिक, सांस्कृतिक व पुरातात्विक ल्याखं अतिकं महत्वं जाःगु जिल्ला जूगु धयादिल ।

उपप्रमुख रजनी जोशीं भुखाचं क्षति याःगु ख्वप देय्या महत्वपूर्ण सम्पदा व स्मारकस्थलत पुनःनिर्माा जुयाच्वंगु व ततःधंगु संरचनात पुनःनिर्माणया निंतिं संघीय सरकारपाखें स्थानीय तहं गुलि आशा याःगु खः, उकथंया ग्वाहालि चूलानाच्वंगु मदु धयादिल । वय्कलं कला संग्रहालय भवन, पुलांगु नगरपालिका भवन, पुलांगु नक्सा शाखाया भवन संघीय सरकारं ग्वाहालि मयाःगुलिं हे पुनःनिर्माण यायेगु ज्याय् ढिलासुस्ती जुयाच्वंगु धयादिल ।