हानं सतक विस्तारया तयारी

छेँ लाःपिं छेँथुवाःतय्त मुआब्जा काः वयेत सार्वजनिक सुचं

येँ – सर्वोच्च अदालतं याःगु फैसला लिपा आः सतक विस्तारया नामय् सरकारं सुयां नं जग्गा अतिक्रमण याये दइ मखु धकाः व्याख्या जुयाच्वंगु हे इलय् उपत्यका विकास प्राधिकरणं म्हिगः पत्रिकाय् छगू सार्वजनिक सुचं पिकासें सतक विस्तार याये ल्यं दनिगु थाय्या मनूतय्सं थःपिनि जग्गाया मुआब्जा काः वा धकाः आह्वान याःगु दु ।

येँ, यल व ख्वपया सडक विस्तारया झ्वलय् जवंखवं च्वंगु सडकया क्षेत्राधिकार (राइट अफ वे) दुने जग्गाया क्षतिपूर्ति काः वा धकाः प्राधिकरणं थ्व सुचं जारी याःगु खः ।

वंगु छवाः न्ह्यः जक सर्वोच्च अदालतं जग्गा प्राप्ति ऐन कथं जग्गा अधिग्रहण यानाः जक जनताया सम्पत्ति काये दइगु निर्णयया पूर्णपाठ पित बिउगु खः ।

प्राधिकरणं पिकाःगु उगु सुचंयात विस्तार पीडित संघर्ष समितिं धाःसा गैरकानुनी धाःगु दु । समितिया संयोजक सुमन साय्मिं नेपालभाषा टाइम्सलिसे खँ ल्हासें राइट अफ वे कथं सडक विस्तार यायेगु खःसा दकलय् न्हापां जग्गा प्राप्त यायेमाःगु खः तर प्राधिकरणं आः तक जग्गा हे प्राप्त मयाःनि धयादिल ।

सर्वोच्चया पूर्णपाठ लिपा वंगु २०७१-८-२५ कुन्हु यानातःगु सचिवस्तरीय निर्णय खारेज जुइधुंकूगु धासें आः जग्गा प्राप्त यायेगु खःसा १६ मिटर जःखःया जग्गा नं स्थानीय जनता लिसे सहलह यानाः जक कायेमाःगु खँ नं वय्कलं कनादिल । निर्णय हे खारेज जुइधुंकाः उकियात आधार दयेकाः सुचं पिकाःगु धइगु संविधान हे विरुद्ध जूगु द्वपं नं वय्कलं बियादिल ।

प्राधिकरणया थ्व सुचं अदालतया अवहेलना जूगु धासें उकिया विरुद्ध मुद्दा तयेगु तयारी जुयाच्वंगु जानकारी नं भाजु साय्मिं बियादिल ।
मेखे लार्हुनिपया महासचिव शंकर लिम्बुं प्राधिकरणया थ्व सुचंया छुं औचित्य मदुगु खँ ‘नेपालभाषा टाइम्स’ यात कनादिल । प्राधिकरणं तःक्वः हे सर्वोच्चया फैसला उल्लंघन यायेगु यानाच्वंगुलिं आन्दोलन अझ नं जारी याये मानिगु खँ नं वय्कलं कनादिल ।

क्षतिपूर्तिया दां तसकं म्हो
येँ -उपत्यका विकास प्राधिकरणं सतक विस्तारया झ्वलय् लाःगु छेँया मुआब्जा काः वा धकाः धाःसां नं उगु मुआब्जा तसकं म्हो जक जुयाच्वंगु खँ सीदुुगु दु । प्राधिकरणं क्षतिपूर्ति कथं बीगु उगु क्षतिपूर्ति न्हापा प्रति वर्गफिट १७५५ तका खःसा उकी ३५ प्रतिशत डिप्रिसेसन काटे यानाः १३५५ तका जक वइगु खँ सीदुगु दु ।

तर आः प्राधिकरणं क्षतिपूर्ति अप्वयेकाः २६०० तका थ्यंकूगु दु । उकी नं ३५ प्रतिशत डिप्रिसेसन कटे यानाः १६९० तका बी । थुकथं स्वयेबलय् क्षतिपूर्ति अप्वःगु खनेदुसां थुकिया आशय धाःसा क्षतिपूर्ति बियाः जग्गा सितिकं कायेगु कथं थ्व सुचं वःगु खनेदु । क्षतिपूर्ति स्वयां न्हापा जग्गा अधिग्रहण यायेमाल अनं लिपा जक छेँ थुनेगुली क्षतिपूर्तिया खँ जुइमाःगु खः । तर प्राधिकरणं हाकनं छकः क्षतिपूर्ति अप्वल धकाः झंगः लायेगु ज्या याःगु द्वपं पीडित जनतां बिउगु दु ।

सम्बन्धित बुखँ

LEAVE YOUR COMMENTS