स्वनिगलय् सतक दुर्घटना अप्वल

येँ – स्वनिगलय् मोटरसाइकल दुर्घटनाय् लानाः सीपिनिगु ल्याः अप्वयाच्वंगु लिपांगु छगू तथ्यांकं क्यंगु दु । स्वनिगलय् जुइगु सवारी दुर्घटनाय् अप्वःथें मोटरसाइकल व स्कुटरया ल्याः अप्वः दुसा थ्व हे सवारी साधन दुर्घटनाय् लानाः सीपिं नं अप्वयाच्वंगु दु । महानगरीय ट्राफिक प्रहरी महाशाखायाकथं वंगु आर्थिक दँय् सवारी दुर्घटनाय् लानाः स्वनिगलय् जक २५४ म्ह सीगु दुसा उकीमध्ये मोटरसाइकल व स्कुटर दुर्घटनाय् लानाः सीपिं ११५ म्ह दु ।

अथे हे मोटरसाइकल व स्कुटर बाहेकं सतक दुर्घटनाय् सीपिं लँजुवाःतय् ल्याः अप्वः दुगु महाशाखां जानकारी बिउगु दु । महाशाखाया कथं वंगु आर्थिक दँय् ९३ म्ह लँजुवाः सतक दुर्घटनाय् लानाः सीगु दु । थुकथं हे कार दुर्घटनाय् १६, बस दुर्घटनाय् १२, ट्रक दुर्घटनाय् १२, साइकल दुर्घटनाय् ५ व माइक्रोबस दुर्घटनाय् लानाः छम्ह सीगु तथ्यांक दु ।

महाशाखाया प्रमुखलिसें वरिष्ठ प्रहरी उपरीक्षक वसन्त पन्तं तब्यागु सतक, भौतिक पूर्वाधारया कमि, तीव्र गतिं सवारी चले याइगु लगायत थीथी कारणं सतक दुर्घटना अप्वयाच्वंगु धयादी । वय्कलं धयादी, ‘चालकयाके ट्राफिक ज्ञान आवश्यक मात्राय् मदइगुलि यानाः सतक दुर्घटना अप्वयाच्वंगु खः ।’

आर्थिक दँ ०७४÷७५ य् सतक दुर्घटनाय् लानाः १९४ म्ह सीगु खःसा उकीमध्ये मोटरसाइकल व स्कुटर चालक १११ म्ह सीगु महाशाखाया तथ्यांकं क्यंगु दु । ट्राफिक महाशाखां स्वनिगलय् जुइगु सतक दुर्घटना म्हो यायेगु निंतिं इलय्व्यलय् जनचेतनामूलक ज्याझ्वः न्ह्याकेगुलिसें कक्षा संचालन यायेगु, सवारीया गति सीमित यायेगु, सतकया दथुइ डिभाइडर तयेगु, ट्राफिक संकेतया जानकारी बीगु नापं सतकय् हे थीथीकथंया जनचेतनामूलक ज्याझ्वः याना वयाच्वंगु दु ।

थःगु गन्तव्यय् थ्यंकेत हथाय् चाइगु व याकनं थ्यंकः वनेगु धुनय् तीव्र गतिं सवारी चले याइगु, विपरित दिशां ‘ओभरटेक’ यायेत स्वइगु आदि थीथी कारणं सतक दुर्घटना अप्वयाच्वंगु दु ।