सुशील व अगिनाया निपू म्येँ सार्वजनिक

येँ – म्येँ हालामि सुशील शाही व अगिना तन्डुकार शाहीया नेवाः व खस नेपाली भाय्या यानाः निपू म्येँया म्यूजिक भिडियो सार्वजनिक जूगु दु । सोमवाः छगू ज्याझ्वःया दथुइ वरिष्ठ गायक जुजुकाजी रंजितं ‘माया रे रत्न…’ व ‘आँखामा…’ म्येँ सार्वजनिक यानादीगु खः ।

ज्याझ्वलय् न्ववासें मू पाहाँ रंजितं नेवाः भाय्या संगीत ख्यलय् बांलाःगु सः दुपिं न्हू पुस्ता वःगु खनाः तसकं लय्ताःगु खँ कनादिल । ‘नेवाः भाय्या संगीत ख्यः न्ह्याकीपिं हे मदइ ला धयागु चिन्ता जुयाच्वंगु अवस्थाय् सुशील व अगिना थेंज्याःपिं बांलाःगु सः दुपिं संगीत स्यनाः वःगु खनाः तसकं लय्ताल’ वय्कलं धयादीगु दु ।

न्हापांखुसी सार्वजनिक जूगु माया रे रत्न.. म्येँया संगीतकार, म्येँ च्वमि बहुमुखी कलाकार रामकृष्ण खड्गी खः । थ्व म्येँया म्यूजिक भिडियो नं वय्कलं हे निर्देशन यानादीगु खः । वय्कलं म्यूजिक भिडियो नं म्येँयात ल्वयेक दयेकागु खँ कनादिसें म्येँ स्वयाः कलाकारपिंत हःपाः बियादीत इनाप यानादिल । म्येँ खस नेपाली भाय्या संकिपाय् नं चर्चित कलाकार कर्मा व सलोना वज्राचार्यं मू भूमिकाय् म्हितातःगु दु । थ्व म्येँया छायाँकन, सम्पादन लिसें माःगु प्राविधिक ज्या बालकृष्ण वंशीं यानादीगु जानकारी बिउगु खः ।

म्येँ हालामिपिं सुशील व अगिनां हे निर्माण याःगु थ्व म्येँया म्यूजिक भिडियो सोमवाः सनिलं निसें हे हाइलाइट्स नेपालया युट्युब च्यानलपाखें नं प्रशारण जुइधुंकूगु दु । ज्याझ्वलय् न्ववानादिसें म्येँ हालामि शाहीं थःगु थ्व दकलय् न्हापांगु रेकर्ड जूगु नेवाः म्येँ जूगु खँ कनादिल ।
अथेहे हे म्येँ हालामि शाहीया गुरु संगीतकार नरेन शाक्यं शाहीया सलय् क्लियारिटि व ठहराव दुगु खँ धयादिसें वय्कलं गजल अझ बांलाक हालादीगु खँ कनादिल ।

थ्व म्येँया लिसें सुशील व अगिनां हालातःगु खस नेपाली भाय्या म्येँ माया लाग्यो निरमायाया म्यूजिक भिडियो नं सार्वजनिक जूगु खः । थ्व म्येँया म्यूजिक भिडियोया निर्देशन सुजन शाक्यं यानादीगु दुसा किरण जोशी, तीर्थ अवाले, सुजना वज्राचार्य व हसना महर्जनं म्हितातःगु दु । थ्व म्येँया संगीतकार अनिल तुलाधर खःसा म्येँ च्वमि दिपक विवश आँसु खः ।