सुरजया सब्बुचा पिदन

यल(नेपालभाषा टाइम्स)- नांजाःम्ह कलाकारलिसें संचारकःमि सुरज व्यञ्जनकारया मुक्तक मुना सफू ‘सब्बुचा २’ पिदंगु दु । वंगु शनिवाः थनया खपिन्छेँ त्वालय् जूगु छगू ज्याझ्वःया दथुइ ख्यालिजुजु मदनकृष्ण श्रेष्ठं उगु सफूया पितब्वज्या यानादीगु खः ।

च्वमि ब्यञ्जनकारया अबु सुरेन्द्र व्यञ्जनकारया सभापतित्वय् जूगु मूपाहां ख्यालिजुजु श्रेष्ठ, यल महानगरपालिका ९ वडाअध्यक्ष राजु महर्जन, खपिन्छेँ टोल सुधार समितिया अध्यक्ष राजमान अवालें थःथःगु नुगःखँ तयादीगु खः ।

ज्याझ्वलय् च्वमि व्यञ्जनकारं सफुतिइ दुथ्याःगु मुक्तक न्यंकादिसें थनिं झिंखुदँ न्ह्यः सब्बुचा १ या नापं न्हापांगु मुक्तक मुना सफू पिथनागु जानकारी बियादिल ।
पितब्वज्या जूगु सफूयात कयाः नांजाःम्ह कवि सुधिर ख्वबिं समालोचना यानादीगु खः । उगु सफू यल महानगर ९ वडाया आर्थिक ग्वाहालिं पिदंगु खः ।