न्हापांम्ह मिसा दबू प्याखंम्वः शौभाग्यवति मंत

येँ – न्हापांम्ह मिसा दबू प्याखंम्वः शौभाग्यवति रंजित ७९ दँया बैंशय् मंत । नुगःचुया ल्वचं कयाच्वंम्ह वय्कः जावलाख्यलय् च्वंगु अल्का अस्पतालय् मदुगु खः ।

नुगःचु ल्वचं कयाच्वंम्ह वय्कःयात लिपांगु इलय् कोरोना संक्रमण खनेदुगु अस्पतालं जानकारी बिउगु दु । पद्मकन्या क्याम्पसया उपप्राध्यापक तकं जुयादीम्ह वय्कः हुलाप्याखं स्यनामि नं खः । लोकनृत्य साधककथं नं म्हसिउम्ह वय्कलं पद्मकन्या क्याम्पसय् नृत्य विधाया विषय दुथ्याकेगुलिइ नं तःधंगु भूमिका म्हितादीगु खः ।

तत्कालीन इलय् नासः खलःया सक्रिय दुजः जुयाः भाषा निभाः प्रेमबहादुर कसाःया सक्रियताय् त्वाः त्वालय् दबू प्याखं क्यनेगु अभियानय् उतिकं सक्रिय भूमिका म्हितादीगु खः ।

मदुम्ह शौभाग्यवति रंजितं नेपालभाषाया ख्यलय् आपालं प्रतिष्ठित सिरपाः नं त्याकादीगु दु ।