न्हूम्ह प्रमय् भट्टराईया सम्भावना

येँ – सर्वोच्च अदालतं प्रधानमन्त्री केपी ओली शर्मां वंगु पुस ५ गते याःगु संसद विघटन अवैध जूगु घोषणा यायेधुंकाः आः सुया नेतृत्वय् सरकार गठन जुइ धइगु अनिश्चित जुयाच्वंगु दु ।

सर्वोच्च अदालतया निर्णय लिपा नेपाली कांग्रेस, जनता समाजवादी पार्टी व नेकपा (माओवादी केन्द्र) दथुइ सरकार गठन यायेगु बारे थीथी चरणय् खँल्हाबल्हा जूगु खःसां नं आः तक सरकारया नेतृत्व सुनां यायेगु धइगु बारे निर्णय याये फयाच्वंगु मदुनि ।

थ्वहे झ्वलय् सीदु कथं कांग्रेसया सभापति लिसें पुलांम्ह प्रधानमन्त्री शेरबहादुर देउवां आः थः सरकार सञ्चालन यायेगुपाखे मखुसें पार्टीयात बल्लाकेपाखे सक्रिय जुइ धकाः थीथी सभाय् न्ववायेवं आः कांग्रेसया नेतृत्वय् सरकार गठन जुइगु सम्भावना म्हो जुया वनाच्वंगु विश्लेषण राजनीतिक वृत्तय् जूगु दु । मेखे आः जसपा संघीय परिषदया अध्यक्ष डा. बाबुराम भट्टराईया नेतृत्वय् न्हूगु सरकार गठन जुइ फइगु सम्भावना अप्वया वनाच्वंगु खँ जसपाया केन्द्रीय कार्यकारिणी दुजः गंगानारायण श्रेष्ठं ‘नेपालभाषा टाइम्स’ यात कनादीगु दु ।

वय्कःया कथं आः सरकार गठन यायेगु निंतिं कांग्रेस तयार जुयाच्वंगु मदुसा माओवादी केन्द्रं नं सरकार गठन यायेगु दावी मयानाच्वंगुलिं जसपाया अध्यक्ष डा. भट्टराईया नेतृत्वय् सरकार गठन जुइ फइगु सम्भावना अप्वया वनाच्वंगु दु । ‘२०४६ सालया आन्दोलन लिपा गठन जूगु संसदं १९ गू सिट दुगु राप्रपाया नेतृत्वय् सूर्यबहादुर थापा व लोकन्द्रबहादुर चन्दया नेतृत्वय् सरकार गठन जू थें आः डा. भट्टराईया नेतृत्वय् सरकार गठन मजुइ धकाः धायेफइगु अवस्था मदु’ श्रेष्ठं धयादीगु दु ।

नेता श्रेष्ठं आः गठन जुइगु सरकार अग्रगामी जुइमाः धइगु जनता व राजनीतिक पार्टीया चाहना कथं नं डा. भट्टराईया नेतृत्वय् सरकार गठन जुल धाःसा अजूचायेम्वाःगु खँ कनादिल ।

उकथं हे डा. भट्टराईया स्वकीय सचिव रोशन पोखरेलं नं सरकार गठन यायेगु विषय आः राजनीतिक रुपं अनिर्णित जुयाच्वंगु धासें भट्टराईया नेतृत्वय् सरकार गठन जुइ फइगु खँयात संकेत यानादीगु दु । तर वय्कलं वर्तमान इलय् डा. भट्टराई सरकारया नेतृत्व यायेगु रेसय् मदुसां छुं गथे जुयाः देय्यात निकास बीमालीगु अवस्था वल धाःसा डा. भट्टराईया नेतृत्वय् सरकार गठन जुइगु सम्भावना यक्व दुगु खँ नं स्पष्ट यानादिल ।

वय्कःया कथं थौं च्वनीगु कांग्रेसया पदाधिकारीपिनिगु बैठक लिपा जक कांग्रेसं थुकिया बारे छुं निर्णय याइगु खनेदु । कांग्रेसं याइगु थ्व निर्णय लिपा जक सुयागु नेतृत्वय् सरकार गठन जुइ धाये फइ धासें वय्कलं देय् संकटय् लानाच्वंगु इलय् माल धाःसा डा. भट्टराई सरकारया नेतृत्व यायेगुपाखें लिमचिलीगु खँ नं स्पष्ट यानादिल ।

सम्बन्धित बुखँ

LEAVE YOUR COMMENTS