सम्पत्ति करय् चैत तक छुट

येँ (नेपालभाषा टाइम्स) – येँ महानगरपालिकाया च्याक्वःगु नगरसभा म्हिगःनिसें शुरु जूगु दु । अधिवेशनय् स्वंगू विधेयक पेश जूगु दु। बैठकय् ‘येँ महानगरपालिका वातावरण तथा प्राकृतिक स्रोत संरक्षण यायेत दयेकेगु विधेयक-२०७’’, ‘येँ महानगरपालिका बजाः व्यवस्थापन तथा अनुगमन विधेयक-२०७७’ व ‘येँ महानगरपालिका संस्था दर्ता व नियमन सम्बन्धी विधेयक-२०७७’ पेश जूगु खः ।

उगु विधेयक विभागीय प्रमुख हरिकुमार श्रेष्ठ, हरिबहादुर भण्डारी व दीपक अधिकारीं न्ह्यब्वयादीगु खः । थुगु विधेयक वइगु माघ ७ गतेया बैठकय् निर्णयया नितिं न्ह्यब्वःगु खँ धाःगु दु। पुस २४ गते च्वंगु महानगरया ५५ क्वःगु बैठक कार्यपालिका बैठकय् म्हिगःया सभाय् न्ह्यब्वयेगु प्रस्ताव स्वीकृत याःगु खः ।

येँ महानगरपालिकाया प्रमुख विद्यासुन्दर शाक्यया अध्यक्षताय् न्ह्याःगु बैठकय् चालु आर्थिक दँया ५९ गू ज्याझ्वःयात संशोधन यायेगु प्रस्ताव यानातःगु दु । न्हय्क्वःगु नगरसभां स्वीकृत याःगु ज्याझ्वः मध्ये छुं ज्याझ्वःया शीर्षक भिंकेमाःगु, गुगुंया स्रोत सुनिश्चित यायेमाःगु, कार्यान्वयनय् वये मफुगु ज्याझ्वःयात कार्यान्वयन याये फइगु योजनाय् हयेमाःगुलिं संशोधन प्रस्ताव याःगु खः ।

सभां पुस मसान्त तकया निंतिं सम्पत्ति करय् बियातःगु छुटयात चैत मसान्त तक बीगु निर्णय याःगु दु । कोभिड-१९ महामारीया कारणं उगु छुट बिउगु खः ।

सम्बन्धित बुखँ

LEAVE YOUR COMMENTS