निगू कोरियाया शिखर वार्ता ,कोरिया युद्ध क्वचाःगु घोषणा जुइमाः – उत्तर कोरिया

प्योङयाङ भ्रमणय् वनाच्वंम्ह दक्षिण कोरियाली राष्ट्रपति मुन जे इनं उत्तर कोरिया व अमेरिका दथुइ जुयाच्वंगु परमाणु अस्त्र निःशस्त्रीकरण वार्तायात कयाः खँल्हाबल्हा याइगु खँ धाःगु दु । थुगु दँया सुरुइ हे अमेरिका व उत्तर कोरिया दथुइ सिंगापुरय् ऐतिहासिक शिखर वार्ता याकेगु निंतिं भूमिका म्हितादीम्ह मून जे इनं प्योङयाङय् उत्तर कोरियाली नेता किम जङ अन लिसे निगू चरणय् वार्ता यानादीत्यंगु दु ।

वाशिंगटनं थौंकन्हय् उत्तर कोरियां पूवंक परमाणु अस्त्र निःशस्त्रीकरण यायेमाः धकाः दबाब बियाच्वंगु दु । मेखे उत्तर कोरियां धाःसा सन् १९५०य् निगू कोरिया दथुइ जूगु युद्ध क्वचाःगु औपचारिक घोषणा यायेमाःगु अडान कयाच्वंगु दु । थ्व युद्ध लिपा सन् १९५३ य् निगू कोरिया दथुइ हतियार दिकेगु सहमति जूसां औपचारिक रुपं शान्ति सन्धि धाःसा जूगु मदुनि ।

उत्तर कोरिया लिसे शान्ति वार्ताय् पहल यानाच्वंम्ह मुन जे इनं थ्व पालय्या शिखर वार्ताय् दक्षिण कोरियाया नांजाःगु व्यापारिक कम्पनीया प्रतिनिधितय्त नं दुथ्याःगु दु । मुन जे इन लिसें हुन्डाइ व सामसुङ कम्पनीया प्रतिनिधिलगायतया व्यापारीत उत्तर कोरियाया भ्रमणय् वनाच्वंगु दु ।

मुन जे इन मंगलवाः प्योङयाङय् थ्यंगु खः । वय्कः व वय्कःया जहान किम जङ सुकयात उत्तर कोरियाया नेता किम व वय्कःया जहान रि सोल जुं लसकुस याःगु खः । निगू कोरियाली नेतातय् दथुइ वार्ता जुइत्यंगु थ्व स्वक्वःगुखुसी खः ।

आःया वार्ताय् निम्ह नेता दथुइ कोरियाली प्रायद्वीपय् परमाणु शस्त्र निःशस्त्रीकरणया व्यावहारिक उपाययात कयाः सहलह जुइगु अनुमान यानातःगु दु । अथेखःसां निम्ह नेतातय् दथुइ गज्याःगु खँल्हाबल्हा जुइ धयागु बारे स्पष्ट रुपं छुं धयातःगु मदुनि ।