स्वनिगःया पालिकातसें २८ हजार म्हेसिया ट्रेसिङ याइगु, १५ गते तक स्थानिय तह बन्द

येँ – स्वनिगःया नगरपालिकातय्सं भदाै १५ गते तकया दुने २८ हजार ५ सयया कन्ट्याक्ट ट्रेसिङ याना परीक्षण याइगु जूगु दु । अथेहे स्वनिगःया नगरपालिकात भदाै १५ गते तक बन्द जुइगु जूगु दु । स्वनिगः १८गू पालिकातय्गु फाेरम उपत्यका नगरपालिका फाेरमया थाैं च्वंगु बैठकं थ्व निर्णय याःगु खः । थाैंं हे पत्रकार सम्मेलन याना बेैठकया निर्णय सार्वजनिक यासें येँ महानगरपालिकाया मेयर व फाेरमया नायः विद्या सुन्दर शाक्यंं स्वनिगलय् आःतक २७४६ म्ह काेराेना संक्रमितत लुइधुंकूगु व थ्व ल्याखं २८,५०० म्हेसिया कन्ट्याक्ट् ट्रेसिङ यायेमाःगु खँ धयादीगु खः ।

वय्कलं थ्व ज्या लिबाक जूसा भदाै १५ गते दुने क्वचायेकेगु खँ धयादीगु दु । ‘रहरं पिसिआर परीक्षण याइपिनि स्वयां कन्ट्याक्ट् ट्रेसिङय् लाःपिनि परीक्षण आवश्यक दुु, उकिं कन्ट्याक्ट् ट्रेसिङय् लाःपिं सुलाच्वंसा मालाः मालाः जुसां परीक्षण यायेगु जुइ’ मेयर शाक्यं धयादीगु दु । अथेहे मध्यपुर थिमि नगरपालिकाया मेयर व फाेरमया महासचिव मदनसुन्दर श्रेष्ठं स्वनिगःया नगरपालिकात अत्यावश्यक ज्या नीति बाहेक मेगु ज्या निति भदाै १५ गते तक बन्द यायेगु निर्णय जूगु जानकारी थाैं जूगु पत्रकार सम्मेलनय् बियादिल ।