ओलीयात ल्हाः वायेगु कुतः
येँ (नेपालभाषा टाइम्स)-समृद्धिया लागिं संकल्प यात्रा धकाः मध्य पहाडी राजमार्ग जुयाः चाःहिलाच्वंम्ह एमाले अध्यक्ष लिसें पुलांम्ह प्रधानमन्त्री केपी ओलीयात म्हिगः धनकुटाय् छम्ह मनुखं ल्हाः वायेगु कुतः याःगु दु । न्हिनय् १२ बजेपाखे धनकुटाया लेगुवा धाःगु थासय् न्यासि वनाच्वंम्ह ओलीयात लसकुस यायेत लाइनय् च्वनाः स्वां देछाये थें यानाः वःम्ह उम्ह मनुखं न्ह्यःने थ्यंकाः स्वां बियाखतं ल्हातं दायेत स्वःगु खः । तर वयात मेपिं मनूतय्सं तुरुन्त ज्वनाः घ्वाना छ्वःगुलिं वं छुं याये मखंगु खँ धाःगु दु ।
ओलीयात ल्हाः वायेत स्वःम्ह उम्ह मनूया नां महेश राई खः धाःगु दु । तर व पहिचानवादी वा छुं राजनीतिक पार्टीया कार्यकर्ता धाःसा मखुगु खँ धाःगु दु । उम्ह मनू अय्लाः त्वना वःम्ह जूगुलिं लिपा थः हे ग्वारातूगु खँ एमाले कार्यकर्तातय्सं धाःगु दु ।
उम्ह मनुखं ओलीयात ल्हाः वाःगु भिडियो नापं सार्वजनिक जूगु दु । भिडियोलय् वं ओलीयात दाःगु खः वा मखु धइगु सी मदु । तर हुलय् ल्हाः वाःगु धाःसा खनेदु ।
छुं मनूतय्सं सामाजिक सञ्जालय् महेश राई नांयाम्ह मनुखं ओलीयात ख्वालय् मुक्का नकल धकाः च्वया हःगु दु । एमालेपाखें धाःसा लेगुवाय् थ्व घटना जूगु खःसां उम्ह मनुखं ओलीयात भौतिक आक्रमण याःगु मखु, उकिं अनावश्यक प्रचार मयाःसा जिउ धकाः इनाप याःगु दु ।
दायेत स्वःम्ह मनूयात प्रहरीं ज्वने धुंकूगु दु । वयागु बारे प्रहरीं धाःसा छुं जानकारी बिउगु मदुनि ।
मेखे म्हिगः ओलीया यात्रा पूर्वया तेह्रथुम थ्यंगु दु । तेह्रथुमया बसन्तपुर धाःगु थासय् एमालें तःधंगु आमसभा याःगु खः । अन ओलीया भाषण न्यनेत आपालं मनू उपस्थित जूगु खः । पहिचानवादीतय्सं पूर्वय् ओलीयात दुकाये मखु धकाः बन्दया आह्वान याना तःगु खःसां म्हिगःया ओलीया सभाय् वइपिंत धाःसा बन्दं नं पने मफुगु खँ एमालें धाःगु दु ।
बसन्तपुरया सभाय् ब्वति कायेत प्रदेश १ (कोशी) दुने लाःगु संखुवासभा, धनकुटा, सुनसरी, मोरङ जिल्लां समेत मनूत वःगु खः । यक्व जिल्लां मनू वःगु जुयाः अनया बसन्तपुर हे जाःगु खः ।
म्हीग ओलीया लँ पनेगु कुतः याःपिं च्याम्ह पहिचानवादीतय्त प्रहरीं ज्वना तःगु दुसा उमित आः तक नं त्वःता महःनि । उमित त्वःतेत संघर्ष समितिं इनाप याःगु दु ।
LEAVE YOUR COMMENTS