आरोही पत्रकार महर्जनयात वल्र्ड बुक अफ रेकर्डया दसिपौ

यल-विश्वया दकलय् तःजाःगु च्वापुगुँ सगरमाथाया निगुलिं मोहदापाखें सफल आरोहण यानादीम्ह न्हापांम्ह मिसा पत्रकार कल्पना महर्जनयात ‘वल्र्ड बुक अफ रेकर्ड’या दसिपौ लःल्हाःगु दु ।

यल महानगरपालिकाया ग्वसालय् जूगु विशेषज्याझ्वलय् पत्रकार आरोही महर्जनयात उगु दसिपौ लःल्हाःगु खः । यल महाननगर प्रमुख चिरिबाबु महर्जनया सभापतित्वय् जूगु विशेष ज्याझ्वलय् नेपाःया न्हापांम्ह राष्ट्रपति डा. रामवरण यादवं वल्र्ड बुक अफ रेकर्ड’या दसिपौ आरोही पत्रकार महर्जनयात लःल्हानादीगु खः ।

पत्रकार महर्जनं २०७५ जेठ ९ गते नेपाः व वयां दछि लिपा २०७६ जेठ ९ गते चीनपाखें सगरमाथाया सफल आरोहण यानाः निगुलिं मोहदापाखें सगरमाथाया सफल आरोहण यानादीम्ह न्हापांम्ह मिसा पत्रकारया कीर्तिमान तयादीगु खः ।

सगरमाथा आरोहणया झ्वलय् वय्कलं वाङ्मय शताब्दीपुरुष सत्यमोहन जोशी सछिदँ दुगु लसताय् वय्कःया किपा दुगु ध्वाँय् सगरमाथाया च्वकाय् ब्वयेकादीगु खःसा शिक्षाया माध्यमं बालविवाह रोकथामया निंतिं अभियानया नं घोषणा यानादीगु खः ।
वय्कःया आरोहणया संयोजन एक्सपिरियन्स आउटडोर नेपाल प्रा.लि.या रविन्द्र महर्जनं यानादीगु खः ।

ज्याझ्वःया संयोजन यल महानगर उपप्रमुख गीता सत्यालं यानादीगु खः ।