चुनाव स्यंकेगु कुतः याइपिंत गन ज्वन अन हे कारवाही !
येँ (नेपालभाषा टाइम्स)÷ मंसिर ४ गते जुइगु संघ व प्रदेश निगुलिं सभाया चुनाव स्यंकेगु लागिं सुनानं कुतः यात धाःसा उमित कारबाही यायेगु तुति खाके मते धकाः निर्वाचन आयोगं निर्देशन बिउगु दु ।
आयोगं कानुनया व्यवस्थायात पूर्ण रुपं अध्ययन यानाः सतप्रतिशत कार्यान्वयन याकेत निर्वाचन अधिकृततय्त निर्देशन बिउगु खः । कानुनया प्रभावकारी कार्यान्वयनं जक निर्वाचन स्वच्छ, स्वतन्त्र, निष्पक्ष व भयरहित जुइ धासें निर्वाचन स्यंकेत स्वइपिं व्यक्ति व तत्वयात कारबाही यायेगु खँय् लिमचिलेत आयोगं निर्देशन बिउगु दु ।
म्हिगः सञ्चार माध्यमलिसे खँ ल्हायेगु झ्वलय् प्रमुख निर्वाचन आयुक्त दिनेशकुमार थपलियां कानुनया प्रभावकारी कार्यान्वयन यायेगु खँय् निर्वाचन अधिकृततय्सं पूर्ण रुपं ध्यान बीमाः धासें निर्वाचन स्यंकेत स्वइपिंत नियन्त्रणय् कयाः कानुनी कारबाही यायेफइगु खँ नं धयादीगु दु ।
प्रमुख आयुक्त थपलियां गुलिखे थासय् न्ह्याथे यानाः नं चुनाव त्याकेमाः धइगु मानसिकता दुपिं उम्मेदवार दुगुलिं फर्जी मतदान जुइगु खतरा दुगु धासें चनाखो जुइत नं निर्देशन बियादीगु दु ।
वय्कलं मतदान यायेधुंकाः नं मनूत हाकनं मतदान याइगु थासय् वयाः पंगः थं वये फइगु अवस्थायात समेत ध्यानय् तयाः सुरक्षा निकायलिसे समन्वय यानाः अज्याःगु गतिविधि मजुइकेत नं इनाप यानादीगु दु ।
उकथं हे थपलियां निर्वाचनया तयारी लिपांगु चरणय् थ्यंगु खँ धयादीगु दु । वय्कलं आयोगं आः फुक्कं निर्वाचन अधिकृतया कार्यालयपाखे मतदान ज्याय् खटे जुइपिं मतदान अधिकृत व सहायक मतदान अधिकृत व मेपिं कर्मचारी नियुक्त जुयाः तालिम बीगु ज्या न्ह्यायेधुंकूगु खँ कनादिल । मतदानया नितिं मतपेटिका, मतपत्र लगायत माःगु फुक्क सामग्रीया समान महत्व दु धासें वय्कलं सामान रुजु यायेबलय् पर्याप्त जू मजू स्वयेत नं इनाप यानादीगु दु ।
उकथं हे वय्कलं निर्वाचन कुन्हु दकलय् महत्वपूर्ण ज्या मतपत्रय् दस्तखत जूगुलिं निर्वाचन अधिकृतं थ्व खँय् लापरबाही यायेमजिउगु खँय् नं सचेत यानादीगु दु । प्यंगू बिस्कं बिस्कं मतपत्रय् छाप तयेमाःगु व्यवस्था यानागुलिं मतदातायात बांलाक थुइकेत नं निर्देशन बियादीगु दु ।
चुनाव स्यंकीपिंत ठीक यायेगु तालिम
मतदान कुन्हु सुनानं चुनाव स्यंकेगु कुतः यात धाःसा वयात गय् यानाः ठीक यायेगु धकाः सुरक्षा निकायतय्सं तयारी पूवंकुगु दु । म्हिगः सिंहदरवार दुने च्वंगु नेपाली सेनाया चण्डिदल गणय् सुरक्षाकर्मीतय्सं चुनाव स्यंकः वइपिंत गय् यानाः निष्क्रिय यायेगु व नियन्त्रणय् कायेगु धकाः थःगु कौशल प्रदर्शन याःगु खः । उगु कौशल प्रदर्शनीइ निर्वाचन अधिकृत लिसें सुरक्षा निकायया पदाधिकारीत दुगु खः । उकी सेना व निगुलिं प्रहरीया ७० म्ह सुरक्षाकर्मीतय्सं ब्वति काःगु खः ।
LEAVE YOUR COMMENTS