फाइजरया स्वंगूगु डोज बिइत अनुमति काइगु

एजेन्सी- अमेरिकाया वासः कम्पनी फाइजरं दयेकूगु कोरोनाविरुद्धया खोपया स्वंगूगु डोज बिइत अनुमति काइगु जूगु दु । कम्पनीं धाःकथं दछिया दुने खोपया स्वंगूगु डोज बिल धाःसा कोरोना विरुद्ध ल्वायेगु क्षमता अझ अप्वइ । कम्पनीं स्वंगूगु डोज बिलकि कोरोनाया डेल्टा भेरियन्टलिसे नं ल्वाये फइगु धाःगु दु । थीथी देसय् याःगु अनुसन्धानकथं फाइजर खोप कोरोना भाइरसया डेल्टा भेरियन्टलिसे ल्वायेत मेमेगु खोपसिबें प्रभावकारी खनेदु । थौकन्हय् विश्वन्यंकं डेल्टा भेरियन्ट खनेदयाच्वंगु दु ।

फाइजर कम्पनीं आः वइगु अगष्टय् अमेरिकाया फुड एण्ड ड्रग एडमिनिस्टे«शनयाके स्वंगूगु डोज बिइगु अनुमति कायेगु धाःगु दु । कम्पनीं खोपया स्वंगूगु डोजं मनूतय्गु म्हय् ५ निसें १० गुणा तक एन्टीबडी विकास याइ धाःगु दु ।

विश्वन्यंकं थौंकन्हय् थीथी कोरोनाविरुद्धया खोप बियावयाच्वंगु दु । खोपया निगू डोज कायेधुंकाः कोरोनाया डेल्टालिसें मेमेगु नं भेरियन्टलिसे ल्वायेत खोपं मनूतय्गु म्हय् एन्टीबडीया विकास याइ । थथे खःसां एन्टीबडी म्हो जुयावन धाःसा स्वंगूगु डोज गबले बिइ माली धकाः अनुसन्धान नं जुयाच्वंगु दु ।