कोरोनाया खोप वःसा सुरक्षा यायेत हाथ्या

येँ (नेपालभाषा टाइम्स) – संसारया छुं नं देशं यदि कोरोनाया खोप दयेकल धाःसा न्हापांगु लटय् हे प्रयोग याये खनीगु देय्त मध्ये नेपाः नं लानाच्वंगु दु । कोरोनाया खोप दयेकल धाःसा तुरुन्त न्याये माली धकाः कानुनी व्यवस्था मिले यायेत नेपाल सरकारं अध्यादेश मार्फत कानून समेत पित बीधुंकूगु दु ।

तर विज्ञतय्सं धाःसा कोरोनाया खोप नेपाः दुहां वइबलय् उकिया सुरक्षाय् तःधंगु हाथ्या वइगु बिचाः न्ह्यःने तये हःगु दु । खोप तयार जुइवं नेपाःया २० प्रतिशत जनताया लागिं जक निं गाक्क खोप दुहां वइ । उकी नं ३ प्रतिशत खोप कोरोना विरुद्ध फ्रन्ट लाइनय् च्वनाः ज्या यानाच्वंपिं मनूतय्त हे बीमाःगु प्रावधान दु । बाँकी १७ प्रतिशत खोप जक पिने बजारय् वइ । सकस्यां थःपिंसं निं न्हापां खोप कायेत कुतः याइबलय् खोपया वितरणं तःधंगु ल्वापु समेत पिकाये फइगु अनुमान नं विज्ञतय्सं याना हःगु दु ।

अथे हे नेपाःया लागिं धकाः हःगु खोप दथुं हे खुयाः भारतपाखे मी यंकीगु खतरा नं उलि हे दुगु खँ नं विज्ञतय्सं धाःगु दु ।  विश्व स्वास्थ्य संगठन लिसे आवद्ध डा. सुधिर खनालं न्हापा हेपाटाइटिस ‘बी’ या खोप नं नेपालं खुयाः भारतय् निर्यात जूगु खँ लुमंकुसें कोरोनाया खोप व स्वयां नं महत्वपूर्ण जुइगु जुयाः थज्याःगु सम्भावना अझ अप्वः दइगु बिचाः न्ह्यथनादीगु दु ।

थौंकन्हय् कोरोनां सीपिनि व्यवस्थापन सेनां यानाच्वं थें कन्हय् कोरोना खोपया सुरक्षा नं सेनां हे याये मालीगु बिचाः समेत वय्कलं तयादीगु दु ।

सम्बन्धित बुखँ

LEAVE YOUR COMMENTS