धरानय् तःजिक क्वचाल यःमरि उत्सव

येँ- नेवाः देय् दबू धरानया ग्वसालय् जूगु यःमरि सांस्कृतिक व पर्यटन उत्सव–२०७६ तःजिक क्वचाल । वंगु पुस ९ गतेनिसें १२ गतेतक प्यन्हुयंकं जूगु उलेज्या व समापन ज्याझ्वलय् धरान उपमहानगरपालिकाया प्रमुख तिलक राई मूपाहांकथं झायादीगु खः । उत्सवया न्हापांगु न्हिकुन्हु उलेज्यालिसें नेवाः सांस्कृतिक ज्याझ्वः न्ह्यब्वःगु खःसा निन्हुया न्हिकुन्हु बहुजातीय सांस्कृतिक ज्याझ्वलिसें घिन्तांघिसि, लाखेप्याखं व दाफा म्येँ न्ह्यब्वःगु खः । अथे हे स्वन्हुया न्हिकुन्हु थीथी कलाकारतय्सं सांगीतिक ज्याझ्वःया प्रस्तुति बिउगु खःसा लिपांगु न्हिकुन्हु राष्ट्रियस्तरया कलाकारतय्पाखें सांस्कृतिक ज्याझ्वः न्ह्यब्वःगु खः ।

थ्व बाहेकं परम्परागत चचाप्याखं, नेवाः लोक सांस्कृतिक प्याखं, बहुजातीय सांस्कृतिक ज्याझ्वः उत्सवया आकर्षया केन्द्र जूगु खः । ग्वसाः खलः नेवाः देय् दबू धरानया नायः मनोहर शाक्यं उत्सवय् धरानय् नेवाः समुदायया विशेष परिकारया रुपय् लोकंह्वाःगु यःमरिया सवाः सकसिनं काये खंगु जानकारी बियादिल । वय्कलं नेवाः समुदायया विशेष परिकारया रुपय् दुगु यःमरिलिसें थीथी परिकारया नं सहभागितय्सं सवाः काःगु धासें उत्सवय् नेवाः जक मखसे गैर नेवाःतय्गु नं उल्लेख्य रुपय् सहभागिता दुगु जानकारी बियादिल ।

लिसें वय्कलं यःमरिया सवाः काःपिंसं तसकं ययेकूगु जक मखसे किपा तकं काःपिं नं गाक्कं दुगु धयादिल । उत्सवय् तयातःगु थीथी स्टलय् दक्वं धइथें थासय् यःमरि तयातःगुलिं सकसिनं उकिया सवाः काये खंगु नं वय्कलं धयादिल । उत्सवया संयोजक शिला वज्राचार्यं थुकथं यःमरि उत्सव ग्वसाः ग्वयागु थ्व च्याक्वःखुसी जूगु जानकारी बियादिसें थुगुसी उत्सवय् वःपिं सकसिनं हे यःमरिया सवाः काये खंगु धयादिल । लिसें वय्कलं थुगुसी महोत्सवयात हे लक्षित यानाः मिसा व मिजंयात यःमरि दयेकेगु तालिम बियागु नं जानकारी बियादिल ।