अनुवाद साहित्यं नेवाः संस्कृति प्रचार याइ

येँ – नेवाः सभ्यता, नेवाः संस्कृति, कला, साहित्ययात तब्याक न्यंका यंकेगु खःसा नेवाः साहित्य, कृतिया अनुवाद जुइमाःगु खँ धाःगु दु । वरिष्ठ आख्यानकार भाषाथुवाः मथुरा साय्मिया पुलांगु उपन्यास ‘मचाया मां’या अंग्रेजी अनुवाद ‘ए बेबीज् मदर’ व उपन्यासकार राज साय्मिया सामाजिक उपन्यास ‘पामिला’या विमोचन यानादिसें वरिष्ठ भाषाविद् डा. तेजरत्न कंसाकारं थ्व खँ धयादीगु खः।

ज्याझ्वलय् न्ववानादिसें वय्कलं धयादिल, ‘जिं अनुवाद यानागु चित्तधर हृदयया ‘सुगत सौरभं’ नेवाः सभ्यतायात छुं भचासां संसारय् म्हसीका बीफुगु तायेका । अथेहे नेवाःतय् तजिलजि, साहित्य, संस्कार, संस्कृति संसारन्यंकं थ्यंकेगु खःसा नेवाः साहित्यया थीथी भासं अनुवाद जुइमाः ।’

थम्हं मरुसतः दयेकूगु ईया तान्त्रिक लीलाबज्रया बारे बौद्धविद्वान व संस्कृतिविद् यज्ञमानपति वज्राचार्यं च्वयातःगु सफूया लिसें मेमेगु सफूत अनुवाद यानातयागु खँ कनादिसें वय्कलं थुपिं सफू प्रकाशन धाःसा जुइ मफयाच्वंगु खँय् दुःख प्वंकादिल ।

‘लीलावज्र सम्बन्धी सफूयात कयाः गुलि विदेशीतय्सं गबलय् पिहां वइ धकाः न्यनाच्वंगु दु, उमिसं थज्याःगु सफूया पाखें हे नेवाःतय् बारे सीकीगु थुइकीगु खः । उपिं झीगु बारे ब्वनेत तसकं इच्छुक दु’ वय्कलं धयादिल ।

शनिवाः विमोचन जूगु उपन्यासकार मथुरा साय्मिया उपन्यासयात राजेन मानन्धरं अनुवाद यानादीगु खः । अथेहेजासुसी उपन्यास च्वया वयाच्वनादीम्ह उपन्यासकार राज साय्मिं च्वयादीगु न्हापांगु सामाजिक उपन्यास ‘पामिला’ खः ।

सफू विमाेचनया भिडियाे स्वयादिसँ ।