कुमारी, गणेश व भैरवया श्रीपद भत्ता अप्वल
येँ – येँया लाय्कू कुमारीयात येँ मनपां बीगु याना वयाच्वंगु श्रीपद् भत्ता वृद्धि याःगु दु । लिसें पुलांपिं कुमारी व कुमारी गणेश भैरवयात बीगु भत्ता नं अप्वयेकूगु दु । येँ महानगरपालिकां आः वर्तमान कुमारीयात लय् ५० हजार तका श्रीपद भत्ता बीगु जूगु दु । लिसें कुमारी माजुया सुसाःकुसाः याइपिं चिताइदारयात बीगु भत्ता सुविधा नं बढे यानाः लय् ५० हजार तका याःगु दु । न्हापा थ्व भत्ता ४०÷४० हजार तका जुयाच्वंगु खः ।
उकथं हे पुलांपिं कुमारीपिंत बीगु श्रीपद भत्ता नं आः लय् १५ हजार तका याःगु दु । न्हापा थ्व भत्ता लय १० हजार तका यानातःगु खः । लिसें वर्तमान द्यःभाजुपिं गणेश व भैरवया श्रीपद भत्ता नं अप्वयेकाः आः लय् ३०÷३० हजार याःगु दु । न्हापा थ्व भत्ता १५÷१५ हजार तका यानातःगु खः । अथे हे पुलांपिं गणेश व भैरवयात बीगु श्रीपद भत्ता नं आः लय् १२ हजार तका याःगु दु । न्हापा थ्व भत्ता लय् ८ हजार तका याना तःगु खः ।
म्हिगः थनया नेपाः ब्यांक्वेटय् याःगु छगू ज्याझ्वःया दथुइ येँ मनपाया मेयर विद्यासुन्दर शाक्यं सकलें पुलांपिं कुमारी लिसें गणेश व भैरवपिंत दछिया एकमुष्ठ दांया चेक लःल्हानादीगु खः । वर्तमान कुमारीया भत्ता धाःसा वसपोलया नामय् चायेकातःगु बैंक खाताय् हे तप्यंक वनी ।
लिसें म्हिगः न्ह्यःने वयाच्वंगु यँयाः पुन्हि तःजिक न्यायेकेगु लागिं थ्व पर्वय् संलग्न जुइमाःगु थीथी जात्राया खलःत जानाः गठन यानातःगु इन्द्रजात्रा व्यवस्थापन समितियात नं एकमुष्ठ दां लःल्हाःगु खः । ज्याझ्वलय् न्ववासें मेयर शाक्यं थुगुसी यँयाः जात्रायात विदेशय् तकं प्रचार यायेगु लागिं थीथी देशया भगिनी स्वापू दुगु शहरया मेयरपिंत जात्रा स्वयेत सःतागु जानकारी बियादिल । यँयाः जात्रां विदेशय् नेपाःया म्हसीका बियाच्वंगु जूगुलिं थुकियात फक्व भव्य रुपं हनेत नं वय्कलं इनाप यानादिल ।
ज्याझ्वलय् न्ववासें वय्कलं गुथि विधेयकय् वयाच्वंगु विवाद समाधान यानाः वनेत सकस्यां छगू हे मत जुयाः न्ह्याः वनेत नं इनाप यानादिल । ज्याझ्वलय् येँया संघीय सांसदपिं कृष्णगोपाल श्रेष्ठ, भिमसेनदास प्रधान लिसें प्रदेश सांसदपिंसं नं सम्बोधन यानादीगु खः ।
ज्याझ्वलय् पुलांपिं कुमारी, पुलांपिं गणेश व भैरवपिं लिसें थीथी द्यः प्याखंया दुजःपिं नं उपस्थित जुयादीगु खः ।
LEAVE YOUR COMMENTS