दबूछेँ निर्माणया ज्या न्ह्याकेगु तयारी

येँ (नेपालभाषा टाइम्स) – नेपालभाषा मंकाः खलःया दबूछेँ दयेकेगु ज्या शुरु जुइगु जूगु दु। दबूछेँ दनेगु लागिं येँ महानगरपालिकापाखें टेण्डर आह्वान समेत यायेधुंकूगु दु। मंकाः खलःया थुगु दबूछेँ येँ महानगरपालिकापाखें निर्माण यानाबीत्यंगु खः । थुकिया लागिं येँ मनपापाखें न्यागू करोड तका बीगु निर्णय जुइधुंकूगु दु । दबूछेँ निर्माणया लागिं आह्वान याःगु टेण्डर आः वइगु मंसिरया १८ गते खोले याइगु खँ सीदुगु दु। टेण्डर खोले यानाः ठेकेदार निर्धारण यायेवं निर्माण ज्या न्ह्याइगु खँ धाःगु दु ।

दबूछेँ निर्माणया लागिं टेण्डर आह्वान लिसें आः न्ह्याकेमाःगु ज्याखँयात कयाः म्हिगः मंकाः खलःया मुँज्या नं च्वंगु खः । मुँज्यां दबूछेँ निर्माणया लागिं ग्वाहालि पुचः नीस्वनेगु, दबूछेँ निर्माण पुचः व मंकाः खलःया अस्थायी ज्याकू चायेकेगु, दबूछेँ निर्माणया सुपरिवेक्षण यायेत कर्मचारी हे नियुक्त यानाः ज्या न्ह्याकेगु आदि निर्णय नं याःगु दु ।

आः दयेकेत्यंगु मंकाः खलःया दबूछेँ न्यातँजाःया जुइ । उकिया दकलय् च्वय्या तँय् १६० सिट क्षमताया आधुनिक दबू सहितया हल दइ । अन प्याखं व फिल्म समेत स्वये फइ । थुकिया नापं ५०-६० सिट क्षमताया मेमेगु चिचीधंगु हल नं दइ । तले थहां वनेत छगू लिफ्ट नं दइ । दकलय् क्वय् अण्डरग्राउण्ड पार्किङया व्यवस्था जुइ । छेँया पिनेया ब्व नेवाः वास्तुशैली कथं निर्माण जुइगु कथं डिजायन यानातःगु दु ।

थगुने न्हूदँ कुन्हु येँ महानगरपालिकाया मेयर विद्यासुन्दर शाक्यं मंकाः दबूछेँ निर्माणया जग स्वनादीगु खः । दबूछेँ वय्कःया हे कार्यकालय्सि धयेकेगु ताः तयातःगु दु ।