ओली प्रम जुइवं दिनगन्ती नं शुरु

एमालेया अध्यक्ष केपी शर्मा ओली प्रधानमन्त्री जुयादीगु दिनंनिसें हे वय्कः गुलि ई तक प्रधानमन्त्री जुयादी धकाः दिनगन्ती नं सुरु जूगु दु । माओवादी केन्द्रया समर्थनय् ओली प्रधानमन्त्री जुयादीगु जूसां माओवादी केन्द्र सरकारय् मवनेवं हे अथे दिनगन्ती सुरु जूगु खः । प्रधानमन्त्री जुयादीगु दिनय् ओलीया सपथ ग्रहण ज्याझ्वःयात तकं माओवादी केन्द्रया अध्यक्ष पुष्पकमल दाहालं पियामच्वँसे सिन्धुलीपाखे वनादीगुया अर्थ अवश्य नं दु ।

यक्व पुलांगु खँ मखु दत्या न्ह्यःया जक खँ खः । अबले एमालेया अध्यक्ष केपी शर्मा ओली व माओवादी केन्द्रया अध्यक्ष पुष्पकमल दाहालया दथुइ दछि दछि प्रधानमन्त्री जुइगु सहमति जुयाः न्हापां माओवादीया समर्थनय् ओली प्रधान–मन्त्री जुयादीगु खः । तर एमालेया अध्यक्ष ओलीं लिपा उकथंया सहमति जूगु हे मदु धकाः धयादीवं माओवादी केन्द्रया अध्यक्ष दाहालं सपर्थन लित काल । अन्ततः ओली सिंहदरवारं पिहां वनेत बाध्य जुल ।

थनि झिंच्याला न्ह्यः ओली सिंहदरवारं पिहां वनेवं हे कांग्रेसया समर्थनय् माओवादी अध्यक्ष पुष्पकमल दाहाल प्रधानमन्त्री जुयादीगु खःसा अनं लिपा सहमति कथं हे कांग्रेसया सभापति शेरबहादुर देउवा प्रधानमन्त्री जुयादीगु खः । थुकथं कांग्रेस व माओवादी केन्द्रया दथुइ जूगु सहकार्य अन्ततः स्थानीय तहया चुनावया नं २ नम्बर प्रदेशय् तक थ्यनेवं माओवादी व एमालेया नेतात अजूचाःगु खः ।

मेमेगु प्रदेशय् १ नम्बर जूगु एमाले २ नम्बर प्रदेशय् थ्यंगु अवस्थाय् ५ नम्बरय् लात अले माओवादी केन्द्र ४ नम्बरय् लात । स्थानीय तहया चुनाव धुंकाः प्रतिनिधिसभा व प्रदेशसभाया निर्वाचनय् नं उज्वःगु हे लिच्वः वइ धकाः हथाय्चायाः एमाले अध्यक्ष केपी शर्मा ओली व माओवादी केन्द्रया अध्यक्ष पुष्पकमल दाहालया दथुइ निगू कम्युनिष्ट पार्टी एकता यायेगु धकाः बाम गठबन्धनया नारा बियाः घोषणा यात । वंगु असोज १७ गते जक निगू पार्टी एकता यायेगु घोषणा यानाः माःगु कथंया तयारी यायेत पुचः तकं दयेकेगु ज्या याःगु खः ।

वाम एकताया नारा बियाः चुनावय् वन धाःसा बांलाइ धइगु तायेकाः एमालेयात ६० व माओवादी केन्द्रयात ४० प्रतिशतया भाग इनाः प्रदेशसभा व प्रतिनिधिसभाया चुनावय् वंगु खः । अन्ततः केन्द्र अर्थात संघीय सरकारया सवालय् स्थायी सरकारया निंतिं धकाः जनतां थ्व हे निगू दलयात स्पष्ट बहुमत बिउगु खःसा एमाले याकःचिया जक बहुमत मदइगु कथंया अवस्थाय् लाका बिउगु खः ।

अनंनिसें हे लगातार रुपं एमाले व माओवादी केन्द्रया एकताया चर्चा जुया वयाच्वंगु खः । देयया राजनीतिइ तकं उकिं प्रत्यक्ष वा अप्रत्यक्ष रुपं लिच्वः लाना वयाच्वंगु खः । ओली व दाहालया दथुइ तःक्वःमछि हे वान टु वान वार्ता जुइधुंकल । अले वार्ता सकारात्मक धायेगु नापं सहमति लिक्क थ्यन तकं धायेगु याना वयाच्वंगु खः । लिपांगु इलय् वया ला माओवादी केन्द्रया अध्यक्ष प्रचण्डं ला लिबाक्क जूसां थः प्रधानमन्त्री जुइ धकाः तकं धयादिल । उकिया अर्थ एमालेया अध्यक्ष ओली व माओवादी अध्यक्ष दाहालया दथुइ पाःपाः यानाः प्रधानमन्त्री जुइगु सहमति जूगु खयेमाः धकाः तकं मनूतय्सं अनुमान याःगु खः । अले एकीकृत पार्टीया अध्यक्ष मतसे निम्ह हे सहअध्यक्ष यायेगु सहमति जुल धकाः तकं पिहां वःगु खः । उगु इलय् पार्टीया सह अध्यक्ष निम्ह तयेगु खःसा आः सह प्रधानमन्त्री निम्ह, सह राष्ट्रपति नं निम्ह हे तयेगु ज्या जकं मयाइला धकाः मनूतय्सं टिप्पणी यानाहःगु खः ।

लिपांगु इलय् वयाः एमालें जनताया बहुदलीय जनवाद अर्थात जबजयात मार्ग प्रदर्शक सिद्धान्तया रुपय् एकीकृत पार्टीं नाला कायेमाः धकाः अडान कायेगु अले माओवादी केन्द्रं २१ औं शताब्दीया जनवाद नापं माओवादयात नाला कायेमाः धकाः अडान काःगुलिं विवाद ज्यंकेत थाकुयाच्वंगु खः धकाः धायेगु याना हल । निगू हे दलया गुलिं गुलिं नेतातय्सं एकीकृत पार्टीइ थःपिनिगु हैसियत छु जुइगु खः धकाः न्ह्यसः तयाहःगुलिं नं समस्या झन तच्वया वःगु खः धकाः तकं धायेगु यानाहःगु दु । थ्वहे इलय् एमालेया अध्यक्ष झलनाथ खनाल आः राष्ट्रपति थः जुइगु लाइनय् दुगु, राष्ट्रपति विद्यादेवी भण्डारी हाकनं राष्ट्रपति जुइगु लाइनय् दुगु, माओवादी केन्द्रं राष्ट्रपति वा प्रधानमन्त्री मध्ये छगू अले सभामुख वा राष्ट्रिय सभाया अध्यक्ष मध्ये छगू यानाः निगू पद थःपिंत माः धकाः अडान कयाच्वंगुलिं नं सरकारयात पूर्णता बीगु, माओवादी केन्द्र ओली सरकारय् वनेगु ज्या मजुयाच्वंगु खः ।

थौं वयाः निगू पार्टी एकताया ज्या झन झन स्वतुमतु स्वया वनाच्वंगु दु । विशेष यानाः पार्टीया नेतातय्त व्यवस्थापन यायेगु, एकीकृत पार्टीया मार्ग प्रदर्शक सिद्धान्त नालेगु, सरकारय् सह–भागिताया सवालय् तकं अलमल जुयाः एमाले व माओवादी केन्द्रया एकता यायेगु सवालय् तकं समस्या ब्वलना वःगु खः । लिपांगु इलय् वयाः झन माओवादी केन्द्रया अध्यक्ष पुष्पकमल दाहाल संसदीय दलया नेता जुयादीगु धइगु कन्हय् वनाः प्रधानमन्त्री जुइगु निंतिं हे खः धकाः स्पष्ट जूगु दु । उकिं आः एमालेया अध्यक्ष ओलीयात समर्थन याःगु जूसां छुं ई लिपा माओवादी केन्द्रयात एमालें समर्थन याइगु कथंया दुने दुने सहमति जुयाच्वंगु दुगु खयेमा धकाः अःपुक अनुमान यायेछिं ।

न्हापा नं माओवादी केन्द्रया हे समर्थनय् ओली प्रधानमन्त्री जुयादीगु अले दाहालयात मत्वःतेवं माओवादी केन्द्रं समर्थन लित कायेवं ओली सरकार क्वःदःगु खःसा आः नं माओवादीया समर्थनय् हे ओली सरकार गठन जूगु दु । आः ओली सरकारं न्हूगु संवधान कथं ३५ दिनया दुने प्रतिनिधिसभा व राष्ट्रिय सभाया मंकाः संसदपाखें बहुमत प्राप्त यायेमाःगु बाध्यकारी अवस्था दु । व ई धइगु आः थ्यंमथ्यं स्वीन्हु जक ल्यंदनि । उगु ई तकया दुने एमाले व माओवादी केन्द्रया दथुइ सरकार व पार्टी एकताया सवालय् सहमति जुइ मफुत धाःसा ओली सरकार क्वःदलीगु अवस्था वइ । उकिं आः ओली सरकारया दिनगन्ती सुरु जुइ धुंकूगु दु ।