नेवाः पहःया छेँ दंपिंत सम्मान

किपू (नेपालभाषा टाइम्स) – थौंकन्हय् आधुनिक व न्हू न्हूगु पहःया छेँ दनेगु प्रचलन वयाच्वंगु दु। पुलांगु व परम्परागत छेँया थासय् थुकथं न्हूगु व आधुनिक छेँ दयेकेगु होडबाजी जुयाच्वंगु इलय् किपुलिइ धाःसा पुलांगु छेँ दनीपिं छेँथुवाःयात सम्मानया परम्परा न्ह्याकूगु दु ।

किपू नगरपालिका वडा नं. ६ स्थित पांगा लाछिइ जूगु छगू ज्याझ्वःया दथुइ उकथं पुलांगु व परम्परागत पहलं छेँ दंपिं छेँथुवाःयात सम्मानलिसें पुरस्कार नं वितरण याःगु खः । वंगु शनिवाः थनया पांगालाछिइ जूगु छगू ज्याझ्वःया दथुइ नेवाः परम्परागत शैलीं छेँ दयेकूपिं छेँथुवाःयात  सम्मानलिसें पुरस्कार वितरण याःगु खः ।

२०७२ साल बैशाख १२ गतेया विनाशकारी तःभुखाचं क्षति जूगु छेँयात स्थानीय पांगा विकास केन्द्रया प्राविधिक ग्वाहालिं लोप जुया वनाच्वंगु परम्परागत नेवाः शैलीया छेँ दनेत प्रोत्साहित याःगु खः । केन्द्रया प्राविधिक ग्वाहालिं छेँ निर्माण याःपिंत सम्मान व पुरस्कार वितरण याःगु खः । किपू नगरपालिकाया प्रमुख रमेश महर्जनं छगू ज्याझ्वःया दथुइ परम्परागत छेँ दंपिंत सम्मान व पुरस्कार वितरण यानादीगु खः । ज्याझ्वलय् नवासें किपू नगरप्रमुख महर्जनं नेवाः परम्परागत छेँया थःगु हे मौलिकता दुगु खँ न्ह्यथनादिल । वय्कलं परम्परागत नेवाः शैलीया छेँय् छेँदि, मातं, च्वतँ व बैगः दइगु व थुकी प्रत्येक तँ (तल्ला)या थःथःगु हे महत्व दुगु नं धयादिल ।

थौं अति विकसित धयाच्वंगु अमेरिका थेंज्याःगु देशय् तकं बांलाक छेँ दनेगु ज्या मजुयाच्वंगु इलय् झी थाय् थःगु हे मौलिकतां जाःगु सम्पदाया विकास जुइधुंकूगु खँ न्ह्यथनादिसें नगरप्रमुख महर्जनं धयादिल, ‘झीगु हे सम्पदा, धरोहर स्वयाः इन्जिनियरिङ सयेकाः इमिसं थःगु छेँ दयेकल, तर थौं झीगु देय्या इन्जिनियरतय्सं अनया इन्जिनियरिङ सयेकाः वयाच्वन, थ्व गज्याःगु विडम्बना !’

ज्याझ्वलय् सम्पदाविद् रविन्द्र पुरीं निक्वःगु विश्वयुद्धया इलय्तक झीगु स्वनिगः विश्वया हे निगूगु दकलय् तःधंगु सम्पदा क्षेत्र जुया वयाच्वंगगुलिइ लिपांगु ५०-६०या थुखे ९५ प्रतिशत स्वयां अप्वः अज्याःगु सम्पदात लोप जुया वनेधुंकूगु धयादिल । लिसें वय्कलं आः ल्यं दुगु सकतांकथंया सम्पदायात संरक्षणया निंतिं कुतः यानाच्वंगुलिं किपू नगरपालिका व विकास केन्द्रयात सुभाय् नं देछानादिल ।

पांगा विकास सरोकार केन्द्रया अध्यक्ष प्रशान्त महर्जनया सभापतित्वय् जूगु ज्याझ्वलय् पर्यटन व्यवसायी शेखर सिंह डंगोलं परम्परागत नेवाः शैलीया छेँ सम्बन्धी थःगु प्रतिवेदन न्ह्यब्वयादीगु खः । ज्याझ्वलय् पुलांम्ह राज्यमन्त्री दिलिप महर्जन, किपू नगरपालिका वडा नं. २या अध्यक्ष रमेशमान डंगोलया नं उपस्थिति दुगु खः ।

नेवाः शैलीया छेँ निर्माणयात ग्लोबल रनर्स स्वीडेनया ग्वाहालिं स्वंगू वर्ग विभाजन यानातःगु खःसा न्हापांगु वर्गय् लाःपिं झिंस्वम्हेसित ख्वीद्वःतका, निगूगु वर्गय् लायेत सफल जूपिं खुम्हेसित च्याद्वःतका व स्वंगूगु वर्गय् लायेत ताःलाःपिंत प्रशंसा पत्र लःल्हाःगु खः ।

सम्बन्धित बुखँ

LEAVE YOUR COMMENTS