एमसीसी विरुद्ध गुंगू पार्टी छप्पँ

येँ – सरकारं अमेरिकाया हिन्द प्रशान्त रणनीति अन्तर्गत च्वनेगु कथं मिलेनियम च्यालेन्स कर्पोरेन (एमसीसी) सम्झौता यायेत्यंगु लिसें भारतं नेपाःया कालापानी क्षेत्रयात थःगु दुने लाकाः नक्सा पिकालं नं उगु क्षेत्र लित कायेत सरकारं छुं पहल मयाःगु धासें गुंगू चीधंगु कम्युनिष्ट पार्टीतय्सं सरकार विरुद्ध आन्दोलन याइगु जूगु दु ।

म्हिगः नेकपा (मसाल) या अर्ध भूमिगत महामन्त्री मोहनविक्रम सिंहया अध्यक्षताय् च्वंगु गुंगू पार्टीया मंकाः बैठकं थ्व निर्णय याःगु खः ।
भारतं कालापानीयात थःगु क्षेत्र दुने लाकाः नक्सा सार्वजनिक यायेवं थ्व भूमि लित कायेमाः धकाः आह्वान यानां नं सरकारं वास्ता मयाःगु खँ गुंगू दलया मंकाः वक्तव्यय् धयातःगु दु । अथे हे आः वयाः अमेरिकी साम्राज्यवादयात थाय् त्वःतेगु कथं एमसीसी सम्झौता यायेत्यंगु खँय् सरकारया ध्यानाकर्षण यानां नं वास्ता मयाःगुलिं उकिया विरुद्ध आन्दोलन यायेमाःगु खँ नं वक्तव्यय् धयातःगु दु ।

आन्दोलनया न्हापांगु ज्याझ्वः कथं थ्वहे वइगु माघ २४ गते न्हय्गू प्रदेशया येँ, विराटनगर, जनकपुर, पोखरा, बुटवल, सुर्खेत व धनगढी नगरय् विरोध सभा यायेगु ज्याझ्वः दयेकूगु दु । वयां लिपा हानं मंकाः बैठक त्वःताः तःधंगु ज्याझ्वः यायेगु ख्याच्वः वक्तव्यय् बियातःगु दु ।

वक्तव्यय् मसालपाखें मोहनविक्रम सिंह, नेकपा (क्रान्तिकारी–माओवादी) पाखें मोहन वैद्य, नेकपा (माले) पाखें सीपी मैनाली, राष्ट्रिय जनमोर्चापाखें चित्रबहादुर केसी, देशभक्त जन गणतान्त्रिक मोर्चापाखें सीपी गजुरेल, नेकपापाखें ऋषि कट्टेल, नेकपा (माओादी केन्द्र) पाखें गोपाल किराती, जनसमाजवादी पार्टीपाखें सुभासराज काफ्ले व राष्ट्रिय जागरण परिषद्पाखें महेन्द्र शर्मां हस्ताक्षर यानातःगु दु । थ्व गुंगू दलं कार्यगत एकताया आचार संहिता नं दयेकूगु दु ।

सम्बन्धित बुखँ

LEAVE YOUR COMMENTS