‘नेपाल संवत् छ्यलाबुलाया निंतिं कुुतः याये’
येँ – नेपाल संवत्या आन्दोलनं पूर्णता काःगु मदुनि । राज्यं थ्व संवत्यात राष्ट्रिय मान्यता बिउगु दु, थुकिं छगू चरण जक क्वचाःगु दु । नेपाल संवत्या छ्यलाबुलाया निंतिं राज्यं हे थ्व संवत्यात सम्मान यानाः आवश्यककथंया दक्वं ज्या पूवंकेगु निंतिं कुतः यायेगु जुइ ।
थुगु खँ उपप्रधानलिसें रक्षामन्त्री ईश्वर पोखरेलं वंगु नेपाल संवत् ११४० कछलाथ्व पारुकुन्हु न्हूदँया लसताय् थनया बसन्तपुलिइ जूगु भिंतुना सभाय् नवायेगु झ्वलय् धयादीगु खः ।
ज्याझ्वलय् मूपाहांकथं प्रधानमन्त्री केपी शर्मा ओलीयात ब्वनातःगु खःसां स्वास्थ्यया कारणं वय्कः उपस्थित जुयादी मफयेवं मूपाहांकथं झायादीम्ह उपप्रधानलिसें रक्षामन्त्री पोखरेलं नेपाल संवत्या आन्दोलनं थ्व संवत्यात सार्थक परिणाम बीगु लँपु न्ह्याकी धइगु खँय् थः विश्वस्त दु धयादिल ।
लिसें नेपाल संवत्यात व्यावहारिक छ्यलाबुला हयेगु खँय् मिले मजूगु विषययात कयाः वार्ता, सहलह व बहस न्ह्याकेत नं इनाप यानादिल ।
समारोह समितिया नायः रमेश महर्जनया सभापतित्वय् न्ह्याःगु भिंतुना सभाय् नवासें येँ महानगरपालिकाया प्रमुख विद्यासुन्दर शाक्यं नेपाल संवत्यात नेवाःतय्सं थःगु समुदाय दुने जक सीमित याना तयेगु व थ्व संवत् नेवाःतय्गु जक खः धकाः धायेगु मयासें देय्या सकल जनताया खः धइगु कथं स्वीकार याकेगु स्वयेमाः धयादिल ।
लिसें वय्कलं राज्यपाखें नं उकथंया मान्यता कायेत हे पीदँ न्ह्यवंनिसें आन्दोलन न्ह्याका वयाच्वंगु खँ लुमंकादिसें आः थ्व संवत्यात राज्यस्तरं हे न्हियान्हिथं छ्यलेगु हे जक माग ज्वनाः न्ह्याः वनेमाःगु विचाः प्वंकादिल ।
समारोह समितिया नायः महर्जनं नेपाल संवत्यात राष्ट्रिय मान्यता बीकेया निंतिं तःदँ न्ह्यवंनिसे नेपाल संवत्या सांस्कृतिक आन्दोलन न्ह्याकादीम्ह पद्मरत्न तुलाधरयात लुमंकादिसें आन्दोलनया हे मर्मकथं सरकारं नेपाल संवत्यात राष्ट्रिय मान्यता बिउसां थ्व संवतं आतकं राज्यय् थाय् काये मफयाच्वंगु खँय् दुःख प्वंकादिसे न्हूदँया लसताय् जुइगु थुकथंया दबुलिइ दं वइपिं प्रधानमन्त्रीपिंसं इलय्व्यलय् बिउगु आश्वासन नं पूमवंगु खँय् चिउताः प्वंकादिल ।
ज्याझ्वःया मूपाहां मन्त्री पोखरेलं नेपाल संवत्या प्रवर्तक राष्ट्रिय विभूति शंखधर साख्वाः व मदुम्ह नेवाः न्ह्यलुवा पद्मरत्न तुलाधरया किपाय् सम्मान यासे श्रद्धाञ्जली नं देछायादीगु खः ।
ज्याझ्वलय् विशेष पाहांकथं नेपालभाषा मंकाः खलःया नायः जनकवि दुर्गालाल श्रेष्ठ, समारोह समितिया सल्लाहकार कमिटीया कजि लक्ष्मीदास मानन्धर, पुलांपिं नायःपिं डा. रत्नकमल वैद्य, तीर्थराम डंगोल, भीमसेनदास प्रधान, उत्तमनारायण श्रेष्ठ, सर्वज्ञरत्न तुलाधर, नेवाः न्ह्यलुवालिसें मंकाः खलःया न्वकु मल्ल के. सुन्दर, संघीय संसदया कृष्णगोपाल श्रेष्ठ, जीवनराम श्रेष्ठ, प्रदेश सांसदपिनिगु नं उपस्थिति दुगु खः ।
थ्व स्वयां न्ह्यः बसन्तपुलिं मुनाः न्ह्याःगु भिंतुना सांस्कृतिक ¥याली चिकंमुगः, जैसिदेगः, लगं, ब्रम्हुत्वाः, वन्दे, हिउमत, क्वहिति, भिंद्यःत्वाः, मरु, प्याफः, यतखा, न्यत, थाय्मदु, असं, बालकुमारि, जनबहाः, वंघः, मखं, हनुमानध्वाखा जुयाः बसन्तपुलिइ हे थ्यंकाः भिंतुना सभाय् हिउगु खः ।
न्हूदँया हे लसताय् बसन्तपुलिइ व्यक्तिगत व थीथी संघसंस्था, खलः, पुचःपाखें टिशर्ट, म्येँचाः, साहित्यिक सपूm, पाँय्म्वः, नगुमा लगायतया हलंज्वलं मीगु व्यवस्था याःगु खःसा नेपाल लिपि गुथिपाखें क्यालिजात्रा नं न्ह्याकूगु खः ।
गुथियापाखें थुगुसी भिंतुना सांस्कृतिक ¥याली व सभा जुइगु थीथी थासय् थुकथं क्यालिजात्राया ग्वसाः ग्वःगु खः । गुथिपाखें बसन्तपूलिसें जय बागेश्वरी, यलया मंगलबजाः, ख्वपया दत्तात्रय, थिमिया शंखधर चोक, तोखाया थःनेलाछि, ख्वना, किपूया लाय्कू आदि थासय् नं क्यालिजात्रा याःगु खः ।
LEAVE YOUR COMMENTS