पत्रकारिता क्षमता अभिवृद्धि तालिम क्वचाल

येँ- नेवाः पत्रकार राष्ट्रिय दबू येँ जिल्ला कचाया ग्वसालय् न्ह्याःगु बाःछियंकंया आधारभूत पत्रकारिता क्षमता अभिवृद्धि तालिम क्वचाल । येँ महानगरपालिकाया विशेष ग्वाहालिइ संचालन जूगु उगु पत्रकारिता तालिम वंगु जेठ १५ गतेनिसें न्ह्याःगु खः ।

दबूया येँ जिल्ला कचाया नायः अर्विन्द्रमान सिंहया सभापतित्वय् जूगु समापन ज्याझ्वलय् मूपाहांकथं झायादीम्ह आदिवासी जनजाति उत्थान प्रतिष्ठानया उपाध्यक्ष गोकुलप्रसाद घर्तीं प्रशिक्षार्थीतय्त दसिपौ लःल्हानादिसें पत्रकारिता ख्यलय् इमान्दारिताया आवश्यकता जूगु खँय् बः बियादिल ।

वय्कलं संविधानं बियातःगु अधिकारयात पत्रकारितापाखें जनतायात सुसूचित यायेत इनाप यासें पत्रकारिता ख्यलय् मदिक्क् पलाः न्ह्याकेत इनाप यानादिल ।

नेपाल आदिवासी जनजाति महासंघया अध्यक्ष गेल्जे लामा शेर्पां पत्रकारतय्सं इमान्दार जुयाः पत्रकारिता यायेमाःगु खँय् बः बियादिल ।
तालिमया मुख्य प्रशिक्षक नेपालभाषा टाइम्स न्हिपौया सम्पादक सुरेश मानन्धरं तालिमपाखें प्राप्त ज्ञानयात आः व्यवहारय् नं छ्यलेत इनाप यासें तालिम क्वचाःसां पत्रकारिता यायेगु ज्या शुरु जूगु खँ कनादिल ।

प्रशिक्षार्थी सुनिता तुलाधर शिल्पकारं तालिमया अनुभवयात कयाः नुगःखँ तयादीगु खः । तालिमय् मुख्य प्रशिक्षक मानन्धरं समाचार, नागरिक पत्रकारिता, पत्रकार आचारसंहिता, फिचर लेख च्वयेगु विषयय् प्रशिक्षण बियादीगु खःसा फोटो मनोजरत्न शाहीं फोटो पत्रकारिता, केपी ढुंगानां अनलाइन पत्रकारिता, शोभा महर्जन वज्राचार्यं अभिमुखीकरण, वेद रानां भाषा शुद्धिकरण, प्रमिला मानन्धरं बाल सरोकारया विषयय् तालिम बियादीगु खः ।

ज्याझ्वलय् ग्वसाः खलःपाखें नायः सिंह प्रशिक्षकतय्त मतिनाया चिं लःल्हानादीगु खःसा प्रशिक्षार्थीतय्पाखें नं प्रशिक्षक व ग्वसाः खलःयात मतिनाया चिं लःल्हाःगु खः । तालिमया झ्वलय् प्रशिक्षार्थीतय्त स्वयम्भूय स्थलगत भ्रमण नं याकूगु खः ।

सम्बन्धित बुखँ

LEAVE YOUR COMMENTS