पोषणयुक्त नसा ज्वलंया विषयय् गोष्ठि

येँ(नेपालभाषा टाइम्स)- जगत सुन्दर ब्वनेकुथिइ पोषण व अस्वस्थकर नसा ज्वलंया विषयय् छगू कार्यशाला गोष्ठि जुल । नेपाल रेडक्रस सोसाइटी स्वयम्भू उपशाखाया ग्वसालय् ‘विद्यार्थीया निंतिं पोषण व अस्वस्थकर नसा छगू चुनौति’ विषयय् उगु कार्यशाला गोष्ठि वंगु शनिवाः जूगु खः ।

झीगु स्वास्थ्यया मुख्य आधार हे पोषणयुक्त नसाज्वलं धइगु खँयात मुख्य आधार दयेकाः जूगु कार्यशाला ह्याप्पी नेपाल फिजियोथेरापी व पब्लिक हेल्थ सेन्टर प्रा.लि.या प्राविधिक ग्वाहालिइ ब्वनेकुथिया जुनियर रेडक्रस सर्कलया आतिथ्यताय् जूगु खः ।

जगत सुन्दर ब्वनेकुथिलिसें गीतामाता उच्च माध्यमिक विद्यालय, भक्त विद्याश्रम, स्वर्णिम स्कुल, मोडर्न नेपाल एकेदेमि, न्यु जेनिथ इंग्लिश स्कुल, आनन्दकुटी विद्यापीठ, शान्ति निकुञ्ज मा.वि स्कुलया सहभागिता दुगु खः । कार्यशालाया संयोजन रमेश पाण्डें यानादीगु खःसा पोषण परामर्शदाता मनोज नेपालं परामर्श बियादीगु खः ।

गोष्ठिया हे झ्वलय् सहभागि स्कुलया दथुइ भित्ते पत्रिका लेखन कासा नं न जूगु खः । कासाय् स्वर्णिम मा.वि न्हाप, जगत सुन्दर ब्वनेकुथि लिउ व मोडर्न एकेदेमि लियांलिउ लाःगु खः । कासाया निर्णायकय् मनोज नेपाल, राजेन्द्र श्रेष्ठ, विरेन्द्र वज्राचार्य च्वनादीगु खः ।