राष्ट्रपति चुनावयात कार्यालय स्थापना

येँ (नेपालभाषा टाइम्स)- वइगु फागुन २५ गते जुइगु राष्ट्रपति व उपराष्ट्रपति निर्वाचनया नितिं निर्वाचन आयोगं कार्यालय स्थापना यानाः ज्या न्ह्याकूगु दु । म्हिगःनिसें आयोगं संसद भवन न्हू बानेश्वरय् निर्वाचन अधिकृतया कार्यालय स्थापना यानाः ज्या न्ह्याकूगु खः ।

प्रमुख निर्वाचन आयुक्त दिनेशकुमार थपलियां कार्यालय उलेज्या यासें वइगु फागुन २५ गते सुथय् १० बजे निसें न्हिनय् ३ बजे तक मतदान जुइगु व लिच्वः बहनी ७ बजे तक वइगु जानकारी बियादीगु दु ।

वय्कःया कथं फागुन २५ गते जुइगु राष्ट्रपतिया निर्वाचनय् सुयागुं नं बहुमत मवल धाःसा २६ गते मेगु चरणया निर्वाचन जुइ । उकथं हे राष्ट्रपति लिपा जुइगु मेगु चुनावय् थःगु हे प्रदेशं मतदान यायेफइ कथं कानुन संशोधन यायेगु तयारी जुयाच्वंगु खँ नं वय्कलं कनादिल ।

आयोगं फागुन १३ गते उम्मेदवारी दर्ता, फागुन १६ गते उम्मेदवारया अन्तिम नामावली पिथनेगु व फागुन २५ गते मतदान याकेगु सम्बन्धी कार्यसूची थ्व स्वयां न्ह्यः सार्वजनिक यायेधुंकूगु दु । उकथं हे प्रमुख थपलियां लिपांगु जनगणनाया आधिकारिक लिच्वः आयोगयात मवःगुलिं २०६८ सालया हे जनगणतना कथं मतभार कायम यानाः राष्ट्रपति व उपराष्ट्रपतिया निर्वाचनय् मतदान जुइगु खँ नं धयादीगु दु ।