भ्रष्टाचार विरोधी ज्ञानेन्द्र शाहीयात दाया हल

येँ – ‘नेपाःया निंतिं नेपाःमि’ राष्ट्रिय अभियानया अभियन्ता ज्ञानेन्द्र शाहीयात चितवनय् आक्रमण याःगु दु । आक्रमण लिपा गम्भीर घाःपाः जूम्ह शाहीयात चितवन मेडिकल कलेजय् वासः याकूगु खःसा वयां लिपा थप वासः यायेत येँय् हःगु दु । देय्या थीथी थासय् भ्रष्टाचार विरुद्ध ज्याझ्वः याना वयाच्वंगु ‘नेपाःया निंतिं नेपाःमि’ अभियानं चितवनया भरतपुर चौबिसकोठीइ शनिवाः भ्रष्टाचार विरोधी ज्याझ्वः याःगु खः ।

उगु हे ज्याझ्वलय् ब्वति कायेत वंम्ह शाही च्वनावंगु गाडीइ पूर्वमाओवादी सतीगु वाईसीएलया कार्यकर्तातय्सं आक्रमण याःगु खः । उकी लानाः शाही लिसें मेपिं न्याम्ह नं घाःपाः जूगु दु ।

घाःपाः जूपिं मध्ये माओवादी पार्टीया पुलांम्ह अध्यक्ष पुष्पकमल दाहाल व बाबुराम भट्टराईयात अन्तर्राष्ट्रिय अदालत हेग थ्यंकेगु धम्की बिया वयाच्वंम्ह लेलिन बिष्ट व अभियन्ता ज्योति हमाल नं लाःगु खँ धःगु दु । शाहीयात नेपाल कम्युनिष्ट पार्टीया युवा संगठनं चितवनय् दुहां वनेगुली प्रतिबन्ध तयातःगु खः । प्रहरीं आक्रमणय् ल्हाः दुपिं नेकपाया निम्ह कार्यकर्तायात ज्वनेधुंकूगु दु ।

सम्बन्धित बुखँ

LEAVE YOUR COMMENTS